هم رمضان رسالهسنڭ آخرنده نفسِ أمّارهيى هر نوع عذابدن زياده، آجلق ايله تمرّدينى ترك ايتديگى گبى؛ شيمديكى أهلِ نفاقڭ متمرّدانه سفاهتنڭ جزاسى اولارق عمومه و معصوملره ده گلن بو آجلق و دردِ معيشت بلاسندن أهلِ ضلالت إستفاده ايدوب، رسالۀِ النورڭ فقير شاكردلرينڭ عليهنه إستعمال ايتمك إحتمالى وار. مادام شيمدىيه قدر أكثريتِ مطلقه ايله رسالۀِ النور شاكردلرى، رسالۀِ النور خدمتنى هر بلايه، هر درده بر چاره، بر علاج بولمشلر. بز هر گون خدمت درجهسنده، معيشتده قولايلق، قلبده فرحلق، صيقينتيلره گنيشلك حسّ ايدييورز، گورويورز. ألبته بو دهشتلى يڭى بلالره، مصيبتلره قارشى ده، ينه رسالۀِ النورڭ خدمتيله مقابله ايتمهمز لازمدر.
عموم قارداشلريمزه برر برر سلام ايدييورز.
* * *
عزيز، صدّيق، مبارك، قرآنِ معجز البيانڭ بر وجهِ إعجازينى خارقه قلميله گوسترن و متماديًا دفترِ حسناتنه، او يازديغى قرآنلرى اوقويانلرڭ ثوابلرى يازيلان قيمتدار خسرو!
بڭا گوندرديگڭ ايكى مبارك نسخهدن برنجيسنى سزه حلمى بگله گوندردم. بر حسِّ قبل الوقوع ايله، سن إسپارطهدن آيريلاجقسڭز دييه ايكيسنى بردن بزه گوندرمشدڭ. چوق ده ايى اولدى. شيمدى إسپارطه مدرسة الزهراءِ أكبر و مدرسۀِ نوريۀِ كبرا اولديغندن؛ بو قدسى أثر اوراده، خصوصًا شهورِ ثلاثه گلمك اوزره بر زمانده لازمدر. إن شاء اللّٰه اوراده ده، بزم گبى جزءلرى ايله تقسيم ايله ختمهلر اوقونهجق.
* * *