حادثهلرڭ دلالتيله ديرز كه: بو آناطولىيه عينِ رحمت اولان رسالۀِ النوره قارشى، بو عجيب زمانده بويله عمومى و گنيش بر تعرّضله و بعض يرلرده تعطيله مجبور اولماسى، بو قحط و غلايى و بو عجيب إحتكارى و بركتسزلك و آجلغى نتيجه ويرديگنه بزه قناعت ويردى. شيمدى يانمدهكى أمين و فيضى گبى سائر آرقداشلرم ده عين قناعتدهدرلر.
سعيد النورسى
* * *
(رسالۀِ النور شاكردلرى طرفندن صورولان سؤاله جوابدر)
سؤال: گچن سنه سزدن صورمشدق كه؛ أللى گوندر مراق ايدوب دنيا جريانلرينه باقماديڭز و صورماديڭز، او زمان بزه بر جواب ويرديڭز. گرچه او جواب حقيقتدر و كافيدر. فقط رسالۀِ النورڭ إنتشارى و خدمتى و عالمِ إسلاميتڭ منفعتى نقطهسنده بر درجه باقماڭز لازم ايكن، شيمدى اون اوچ آى اولويور عين حال دوام ايدييور. مراق ايدوب هيچ صورمايورسڭز.
الجواب: (اِنَّ الْاِنْسَانَ لَظَلُومٌ) آيتنه أڭ أعظم بر طرزده شيمديكى بوغوشان إنسانلر مظهر اولمالرندن، اونلره دگل طرفدار اولمق ويا مراقله او جريانلرى تعقيب ايتمك و اونلرڭ يالان، آلداتيجى پروپاغندهلرينى ديڭلهمك و متأثّرانه مجادلهلرينى سير ايتمك، بلكه او عجيب ظلملره باقمق ده جائز دگل. چونكه ظلمه رضا ظلمدر؛ طرفدار اولسه، ظالم اولور. ميل ايتسه (وَلَا تَرْكَنُٓوا اِلَى الَّذٖينَ ظَلَمُوا فَتَمَسَّكُمُ النَّارُ) آيتنه مظهر اولور.