خاص طلبهلر دائرهسنده، رمضان فيضنه، معنوى قزانجلره إن شاء اللّٰه حصّهدار قبول ايديلدى. هر بر صحيفهلرينى برر قيمتدار هديه حكمنده اولان نسخهلرڭ يوزندن، بن سڭا چوق هم پك چوق بورجلى قالدم.
خسرو قارداش! قَسَم ايدرم بنم ألمدن گلسه ايدى، يالڭز بو دفعه آلتون يالديزله يازديغڭ معجزاتِ أحمديهيه مقابل هر بر صحيفهسنه، يالڭز مادّى بر اجرت اولارق برر آلتون هديه ايدهجكدم. حقيقةً أبدى بر گل فابريقهسنه كاتب تعيين ايديلديگڭزه قناعتم قطعيت كسب ايتدى. ربِّ رحيمه حدسز حمد و ثنا اولسون. تصوّرمده خسرو، رشدى بر تك إسم گبى اولمش. ايكيڭزى، رسالۀِ النوره عائد هر شيده برابر بيلييورم و بولويورم. سزه (اَوَمَنْ كَانَ مَيْتًا) آيتنه عائد و بردن خاطره گلن و صبرينڭ ايكى مكتوبنڭ (داها گلمهدن) معنوى تأثيريله يازيلان بر تتمّهيى گوندردم. بر درجه محرمدر، خاص و أمينلره مخصوصدر. شاملى توفيق، آيت الكبرا شعاعنى، حافظ علينڭ اوتوز اوچ (لَا اِلٰهَ اِلَّا اللّٰهُ) ايله توافقلى طرزده بڭا يازسه ايى اولور. قارداشلريمه برر برر سلام.
دعاڭزه محتاج
سعيد النورسى
* * *
عزيز قارداشلرم!
تمادى ايدن تخريباتِ معنويه قارشيسنده (للّٰه الحمد) گيتدكجه رسالۀِ النورڭ معجزانه مقاومتى و سطوتى و قيمتى تزايد ايدييور. ضلالتڭ تمل طاشى و نقطۀِ إستنادى اولان طبيعت طاغوتنى طاغيتوب، قرآن ألنده بر ألماس قلنج اولارق هر طرفده نورلرى صاچار، ظلماتى طاغيتير. فقط ضلالتلرڭ أنواعى چوقدر. او نسبتده رسالهلرڭ دخى آيرى آيرى مزيتلرى، أهمّيتلرى وار. أگر قولاى ايسه، طبيعت لمعهسنى ده بزه گوندريڭز.
* * *