أوت مسلگمزده إخلاصِ تامّهدن صوڭره أڭ بيوك أساس، ثبات و متانتدر. و او متانت جهتيله شيمدىيه قدر چوق وقوعات وار كه؛ اويلهلر، هر برى يوزه مقابل بو خدمتِ نوريهده موفّق اولمش. عادى بر آدم و يگرمى اوتوز ياشنده ايكن، آلتمش يتمش ياشندهكى وليلره تفوّق ايتمشلر وار.
هم بر آدم، كندى باشنه جسارتى گوزل ده اولسه، بر جماعتِ متساندهيه گيردكدن صوڭره، اونلرڭ إستراحتنى و صارصيلماملرينى محافظه ايتمك ايچون، او شخصى جسارتى إستعمال ايدهمز. (سٖيرُوا عَلٰى سَيْرِ اَضْعَفِكُمْ) حديثِ شريفنڭ سرّيله حركت ايتمك، هم شيمديلك بو مشوّش وضعيتلرده چوق ضررلى هم خواجهلرى، هم أهلِ سياستى رسالۀِ النوره قارشى جبهه آلمغه و تجاوز ايتمگه سببيت ويرن شاپقه و أذان مسئلهلرى و دجّال و سفيان عنوانلرى، رسالۀِ النور شاكردلرى يابانيلره قارشى لزومسز مدارِ بحث و منازعه ايديلمهمك لازمدر و إحتياط ايتمك ألزمدر و إعتدالِ دمّى محافظه ايتمك واجبدر. حتّى سزده جزئى بر إحتياطسزلق، بورايه قدر بزه تأثير ايدييور.
رسالۀِ النور بر دائره دگل، متداخل دائرهلر گبى طبقاتى وار. أركانلر و صاحبلر و خاصلر و ناشرلر و طلبهلر و طرفدارلر گبى طبقاتى وار. أركان دائرهسنه لياقتى اولميان، رسالۀِ النوره مخالف جريانه طرفدار اولمامق شرطيله دائره خارجنه آتيلماز. خاصلرڭ خاصيتى بولونميان، ضد بر مسلگه گيرمهمك شرطيله طلبه اولابيلير. بدعه ايله عمل ايدن، قلبًا طرفدار اولمامق شرطيله دوست اولابيلير. اونڭ ايچون، آز بر قصور ايله دشمن صنفنه إلتحاق ايتمهمك ايچون طيشارىيه آتمايڭز. فقط رسالۀِ النورڭ أركانلرنده و صاحبلرندهكى أسرار و نازك تدبيرلره، اونلرى تشريك ايتمهمك گركدر.
* * *