عزيز، صدّيق، مبارك قارداشلرم!
صبرينڭ تعبيريله، رسالۀِ النورڭ ذوالفقارى اولان حزب الأكبرِ نورى الحقّ مأمولمزڭ فوقنده غايت پارلاق و گوزل و دقّتلى و صحّتلى و ياڭليشلرى پك آز بر طرزده جنابِ حقّڭ عنايتيله وجوده گلمش. حافظ على، طاهرى، حافظ مصطفى بو وظيفهده الحقّ تام چاليشمشلر. رسالۀِ النورڭ ألنه بر ألماس قلنج ويرديلر.
قارداشلرم! بو قدسى هديهڭز بو شهره گيرديگى عين زمانده، داها بز خبر آلمادن، مملكتمزده طلبهلر بر كتابه باشلاديغى زمان، كردجه مفتيحانه نامنده بر ضيافت ويردكلرينه تام بر مثال اولارق، رسالۀِ النورڭ بش طلبهسى، آيرى آيرى كويلرده، نه بز، نه اونلر پوسطهدن خبرمز يوقكن، گويا بو قدسى كتابڭ مفتيحانهسى اولارق هر برى، آيرى آيرى طعامدن مركّب بر كوچك ضيافت گتيردكلرى نوعنده، هيچ بر سبب يوقكن، بتون بتون عادته مخالف بر طرزده او بشلرڭ بو نقطهده إتّفاقى و توافقلرى، بشيمز (بن، أمين، فيضى، حلمى، توفيق) متّفقًا قرار ويردك كه، تصادف قطعيًا إمكانى يوق. ديمك بورادهكى مدرسۀِ نوريهنڭ مفتيحانهسى اولارق، رحمتِ إلٰهيه طرفندن بر كرامتِ نوريهدر.
هم اوتوز گوندن بَرى اينهبوليدن هر هفته بر ايكى دفعه گلدكلرى حالده؛ هيچ برى گلمهدن، بردن، سببسز، بر خاص طلبه اوچ گونده يايان اولارق حزب الأكبرله برابر گلدى. ايكنجى گون، گويا اونڭ ايچون گوندريلمش گبى مطبوع حزب الأكبرِ نوريهنڭ بر قسمنى آلدى، گوتوردى.
عزيز قارداشلرم! بو حزبِ نوريه بنم شخصمه عائد پك بيوك بر كرامتِ معنويهسى وار. شيمدى بيان ايتمك زمانى گلدى: