بيلمهملرينڭ و گورمهملرينڭ سرّينى و حكمتنى بيان ايتمك نيتيله باشلادم؛ بر ايكى صحيفه يازدم، پرده قپاندى، گرى قالدى.
بو بش سنهده، بش آلتى دفعه عين مسئلهيه متوجّه اولوب موفّق اولامييوردم. يالڭز او مسئلهنڭ تفرّعاتندن بڭا عائد بر حادثهيى بيان ايتمك إخطار ايديلدى. شويله كه:
حرّيتڭ بدايتنده، رسالۀِ النوردن چوق أوّل، قوّتلى بر اُميد و إعتقاد ايله، أهلِ ايمانڭ مأيوسيتلرينى إزاله ايچون، «إستقبالده بر ايشيق وار، بر نور گورويورم» دييه مژدهلر ويرييوردم. حتّى حرّيتدن أوّل ده طلبهلريمه بشارت ايدردم. تاريخچۀِ حياتمده مرحوم عبد الرحمانڭ يازديغى گبى، سنوحات مثللو رسالهلرده دخى «بن بر ايشيق گورويورم» دييه دهشتلى حادثاته قارشى او اُميد ايله طيانوب مقابله ايدردم. بن ده هركس گبى او ايشيغى سياست عالمنده و حياتِ إجتماعيۀِ إسلاميهده و چوق گنيش بر دائرهده تصوّر ايدردم. حالبوكه حادثاتِ عالم بنى او غيبى إخبارده و بشارتده بر درجه تكذيب ايدوب اميديمى قيراردى.
بردن بر إخطارِ غيبى ايله قطعى قناعت ويرهجك بر صورتده قلبمه گلدى. دينيلدى كه: «جدّى بر علاقه ايله سنڭ أسكيدن بَرى تكرار ايتديگڭ »بر ايشيق وار، بر نور گورهجگز« دييه مژدهلرڭ تأويلى و تفسيرى و تعبيرى، سزڭ حقّڭزده بلكه ايمان جهتيله عالمِ إسلام حقّنده دخى أڭ أهمّيتليسى، رسالۀِ النوردر. بو ايشيقدر، سنى شدّتله علاقهدار ايتمشدى. و بو نوردر كه، أسكيده ده تخيّل و تخمينڭ ايله گنيش دائرهده بلكه سياست عالمنده گلهجك مسعودانه و ديندارانه حالتلرڭ و وضعيتلرڭ مقدّمهسى و مژدهجيسى ايكن، بو معجّل ايشيغى او مؤجّل سعادت تصوّر ايدهرك، أسكى زمانده سياست قپوسيله اونى آرايوردڭ.