صاقين، صاقين! دنيا جريانلرى، خصوصًا سياست جريانلرى و بِالخاصّه خارجه باقان جريانلر سزى تفرقهيه آتماسين. قارشيڭزده إتّحاد ايتمش ضلالت فرقهلرينه قارشى پريشان ايتمهسين! (اَلْحُبُّ فِى اللّٰهِ وَالْبُغْضُ فِى اللّٰهِ) دستورِ رحمانى يرينه، العياذ بِاللّٰه (اَلْحُبُّ فِى السِّيَاسَةِ وَالْبُغْضُ لِلسِّيَاسَةِ) دستورِ شيطانى حكم ايدوب، مَلك گبى بر حقيقت قارداشنه عداوت و الخنّاس گبى بر سياست آرقداشنه محبّت و طرفدارلق ايله ظلمنه رضا گوستروب، جنايتنه معنًا شريك أيلهمسين.
أوت بو زمانده سياست، قلبلرى إفساد ايدر و عصبى روحلرى عذاب ايچنده بيراقير. سلامتِ قلب و إستراحتِ روح ايستهين آدم، سياستى بيراقمالى. أوت، شيمدى كُرۀِ أرضده هركس يا قلبًا، يا روحًا، يا عقلاً، يا بدنًا گلن مصيبتدن حصّهداردر، عذاب چكييور، پريشاندر. بِالخاصّه أهلِ ضلالت و أهلِ غفلت، رحمتِ عموميۀِ إلٰهيهدن و حكمتِ تامّۀِ سبحانيهدن خبرسز اولديغندن، نوعِ بشره رقّتِ جنسيه، علاقهدارلق جهتيله كندى ألمندن باشقه نوعِ بشرڭ شيمديكى أليم و دهشتلى ألملريله دخى متألّم اولوب عذاب چكييور. چونكه لزومسز و مالايعنى بر صورتده وظيفۀِ حقيقيهلرينى و ألزم ايشلرينى بيراقوب آفاقى و سياسى بوغوشمالره و كائناتڭ حادثاتنه مراق ايله ديڭلهيهرك، قاريشهرق روحلرينى سرسم و عقللرينى گوهزه ايتمشلر. و بيلهرك كندى ضررينه فعلاً رضا گوسترمك جهتنده، ضرره راضى اولانه شفقت ايديلمز معناسندهكى (اَلرَّاضٖى بِالضَّرَرِ لَا يُنْظَرُ لَهُ) قاعدۀِ أساسيهسيله شفقت حقّنى و مرحمت لياقتنى كنديلرندن سلب ايتمشلر. اونلره آجينميهجق و شفقت ايديلمز. و لزومسز باشلرينه بلا گتيررلر.