گوسترييور. (اِلَّا الَّذٖينَ اٰمَنُوا وَعَمِلُوا الصَّالِحَاتِ) (آخردهكى ت، ه صاييلير، شدّه صاييلير ايسه) مقامِ جفريسى بيڭ اوچ يوز أللى سكز و طوقوز (١٣٥٨-١٣٥٩) اولان بو سنهنڭ و گلهجك سنهنڭ عين تاريخنى گوسترمكله او خسارتلردن باخصوص معنوى خسارتلردن قورتولمانڭ چارۀِ يگانهسى، ايمان و أعمالِ صالحه اولديغى گبى و مفهومِ مخالفيله، او خسارتڭ ده سببِ يگانهسى كفر و كفران، شكرسزلك يعنى ايمانسزلق، فسق و سفاهت اولديغنى گوستردى. سورۀِ وَ الْعَصْرِنڭ عظمتنى و قدسيتنى و قيصالغيله برابر غايت گنيش و اوزون حقائقڭ خزينهسى اولديغنى تصديق ايدهرك، جنابِ حقّه شكر ايتدك.
أوت عالمِ إسلامڭ، بو عصرڭ أڭ بيوك خسارتى اولان بو دهشتلى ايكنجى حربِ عموميدن قورتولماسنڭ سببى: قرآندن گلن ايمان و أعمالِ صالحه اولديغى گبى؛ فقيرلره گلن آجى آجلق و قحطڭ سببى دخى، اوروجڭ طاتلى آجلغنى چكمدكلرى؛ و زنگينلره گلن خسارت و ضايعاتڭ سببى ده، زكات يرنده إحتكار ايتمهلريدر. و آناطولينڭ بر ميدانِ حرب اولمامسنڭ سببى؛ (اِلَّا الَّذٖينَ اٰمَنُوا) كلمۀِ قدسيهسنڭ حقيقتنى فوق العاده بر صورتده يوز بيڭ إنسانڭ قلبلرينه تحقيقى بر طرزده درس ويرن رسالۀِ النور اولديغنى، پك چوق أمارهلر و شاكردلرندن بيڭلر أهلِ حقيقت و دقّتڭ قناعتلرى إثبات ايدر.
أزجمله: أمارهلردن برى، رسالۀِ النوره صيقنتى ويرن وياخود خدمتندن چكيلن پك چوق آدملرڭ توقات ييمهلرى گبى؛ بو سنه، بو مملكتڭ أطرافنده عمومى بر طرزده رسالۀِ النورڭ إنتشارينه صيقنتى ويروب شيمديكى بر نوع توقّف دورهسى ويرمك خطاسيله، شيمديكى عمومى صيقينتينڭ بر سببى اولديغنى گوسترمسيدر.