عينًا بو جوابدن يگرمى سنه صوڭره، ينه گيجهده: «بى طرف قالوب، گيدن ملكنى گرى آلمقله برابر، مصر و هندى ده قورتارهرق، بزمله إتّحاده گتيرمك، سياستِ عالمجه أڭ بيوك مظفّريت قزانمق واركن؛ شبههلى، دغدغهلى، فائدهسز بر دشمنه (إنگليز) طرفدارلق گوسترمكله مضاعف بر صورتده و ضررلى بر يولى ترجيح ايتمك، بويله ذكى، بلكه داهى إنسانلرڭ نظرنده صاقلى قالماسنڭ حكمتى نهدر؟» دييه سؤال بندن اولدى.
گلن جواب معنوى جانبدن گلدى. بڭا دينيلدى كه: «سن، يگرمى سنه أوّل معنوى سؤاله ويرديگڭ جواب، سنڭ بو سؤالڭه عين جوابدر. يعنى: أگر غالب طرف إلتزام ايديلسه ايدى، ينه ميمسز مدنيت نامنه غالبانه ممانعت گورميهجك بر طرزده بو رژيمى عالمِ إسلامه، مواقعِ مباركهيه تشميل و تطبيق ايديلهجكدى. اوچ يوز أللى ميليون إسلامڭ سلامتى ايچون بو ظاهر ياڭليشى گورمديلر، كور گبى حركت ايتديلر.»
* * *
﴿بِاسْمِهٖ سُبْحَانَهُ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
عزيز، صدّيق، مبارك قارداشلرم!
سزلرڭ بو بايرام معنوى هديهڭز، بايراممى اويله بر تبريك ايتدى كه، بيڭلر كدرم اولسيدى سيلهردى. بيڭ بارك اللّٰه. بويله بر زمانده بويله إخلاصلى صداقت، لِوجه اللّٰه اخوّت و فى سبيل اللّٰه معاونت آنجق عالىهمّت صدّيقينلرده بولونور. خالقِ ذو الجلاله حدسز حمد و شكر اولسون كه، سزڭ گبيلرى قرآنِ حكيمه خادم و رسالۀِ النوره شاكرد أيلهمش.
.........