أوت بو عصرڭ أهمّيتلى و معنوى و علمى بر مرشدى اولان رسالة النورڭ هيئتِ مجموعهسى، سائر شخصى بيوك مرشدلر گبى كندينه موافق و حقيقتِ علميهيه مناسب اولارق، بر قاچ نوعده و بِالخاصّه حقائقِ ايمانيهنڭ إظهارنده، إنتشارنده عظيم كرامتلرى اولديغى گبى؛ اوچ كرامتِ ظاهرهسى بولونان معجزاتِ أحمديه، اوننجى سوز و يگرمى طوقوزنجى سوز و آيت الكبرا گبى چوق رسالهلرى دخى هر برى كندينه مخصوص كرامتلرى بولونديغنى چوق أمارهلر و واقعهلر بڭا قطعى بر قناعت ويرمش. حتّى سكراتده بولونان طلبهلرينه ايماننى قورتارمق ايچون بر مرشد گبى يتيشديگنه متعدّد واقعهلر شبهه بيراقمهيور.
بر ساعت تفكّر، بر سنه عبادتِ نافله حكمنده... بر مثالى «نورڭ حزبِ أكبريدر» دييه مشاهده ايتدم و قناعت گتيردم (حاشيه). سزلره رسالة النورڭ حزبِ أكبرينى و قرآنڭ حزبِ أعظمنى گوندرمك ايستردم. فقط حزبِ أعظم چوق اوزون اولديغندن داها يازديرهمدم. حزبِ أكبر ايسه، ترجمه ايتمك ايستدم؛ شيمديلك واز گچدم. سزڭ گبى قارداشلرڭ ترجمهيه محتاج اولماديغنى دوشونوب، يالڭز عربى صورتنى گوندرهجگم، إن شاء اللّٰه.
سزلره أوّلجه آيت الكبرانڭ برنجى مقامنڭ خلاصهسى ناميله گوندرديگم پارچه، او حزبڭ أساسيدر. إختيارسز، او أساسه كوچك فقرهلر و بعض قيدلر علاوه ايديلديگى وقت، بردن باشقه بر شكل آلدى؛ إنكشاف و إنبساط ايدهرك آيت
___
(حاشيه): آيت الكبرانڭ اوچنجى منزلنڭ باشنده، أحمدِ فاروقى رسالۀِ النور حقّنده ديمش كه: «متكلّميندن برى گلهجك، بتون حقائقِ ايمانيهيى كمالِ وضوح ايله بيان و إثبات ايدهجك.» زمان إثبات ايتدى كه؛ او آدم، آدم دگل بلكه رسالۀِ النوردر. أهلِ كشف رسالۀِ النورى، أهمّيتسز اولان ترجمانى صورتنده كشفلرنده مشاهده ايتمشلر، بر آدم ديمشلر.