كرامتِ عَلويهنڭ ايكنجى أمارهده (فَيَا حَامِلَ الْاِسْمِ) بحثنده (فَقَاتِلْ وَلَا تَخْشَ) برابر اولسه، بيڭ طوقوز يوز قرق (١٩٤٠) كسور اولويور. اَللّٰهُ اَعْلَمُ، او تاريخده بر حربِ عمومىيه إشتراكمزى يعنى أسكى متّفقله دگل، بلكه طرفدارانه اونڭ خصميله إشتراكه إشارت ايدييور دييه خبر ويرمش. ايشته شيمدى عين تاريخدر كه، رسالۀِ النورڭ أركانِ مهمّهسى إشتراك ايدييور.
قارداشلريمزه برر برر سلام ايدرز. حلمى، فيضى، نظيف، أمين سزلره سلام و عرضِ حرمت ايدرلر.
اَلْبَاقِى هُوَ الْبَاقِى
سعيد النورسى
* * *
﴿بِاسْمِهٖ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ بِعَدَدِ حَاصِلِ ضَرْبِ عَاشِرَاتِ دَقَائِقِ
لَيْلَةِ الْقَدْرِ فٖى حُرُوفِ الْقُرْاٰنِ﴾
عزيز، صدّيق قارداشلرم!
أوّلا: بتون روح و جانمله مبارك رمضانڭزى تبريك ايدرم. و او مبارك شهرده ايتديگڭز دعالرڭ، جنابِ حق ياننده مقبول اولماسنى أرحم الرّاحميندن نياز ايدرم.
ثانيًا: بو سنهكى رمضانِ شريف هم عالمِ إسلام ايچون، هم رسالۀِ النور شاكردلرى ايچون غايت أهمّيتلى و پك چوق قيمتليدر. رسالۀِ النور شاكردلرينڭ إشتراكِ أعمالِ اُخرويه دستورِ أساسيهلرى سرّنجه، هر بريسنڭ قزانديغى مقدار، هر بر