عزيز صدّيق قارداشلرم!
رسالۀِ النورڭ قهرمانى اولان خسروڭ بو دفعهكى ايكى هديۀِ قدسيهسى و كرامتكارانه او ايكى سماوى هديهنڭ معنوى إعجازينى گوزلره ده گوسترر بر طرزده بو شهورِ ثلاثهده بزلره و بو محيطه هديه ايتمهسى، رسالۀِ النور نقطۀِ نظرنده معجزانه بر خدمتدر. إن شاء اللّٰه او گل فابريقهسنڭ قلمى، بورالرى ده بر گلستانه چويرهجك. جنابِ حق او قلم صاحبنه، يازديغى هر حرفِ قرآنه مقابل ليلۀِ قدردهكى گبى اوتوز بيڭ ثواب و رحمت و حسنه ويرسين، آمين آمين آمين.
عزيز قارداشلرم! صداقتڭزدن ترشّح ايدن و حدّيمڭ پك چوق فوقنده حسنِ ظنّڭزه قارشى بوندن أوّل ويرديگم جوابڭ بر تتمّهسى اولارق، بو گلهجك فقرهيى ايكى گون أوّل يازمشدق. سزڭ فوق العاده صداقت و علوِّ همّتڭزدن ترشّح ايدن بر هفته أوّلكى مكتوبڭزه قارشى حسنِ ظنّڭزى بر درجه جرح ايدن بنم جوابمڭ حكمتى شودر كه:
بو زمانده اويله فوق العاده حاكم جريانلر وار كه، هر شيئى كندى حسابنه آلديغى ايچون، فرضا حقيقى بكلهنيلن او ذات دخى بو زمانده گلسه، حركاتنى او جريانلره قاپديرمهمق ايچون سياست عالمندهكى وضعيتدن فراغت ايدهجك و هدفنى دگيشديرهجك دييه تخمين ايدييورم.
هم اوچ مسئله وار: برى حيات، برى شريعت، برى ايماندر. حقيقت نقطهسنده أڭ مهمّى و أڭ أعظمى، ايمان مسئلهسيدر. فقط شيمديكى عمومڭ نظرنده و حالِ عالم إلجاآتنده أڭ مهم مسئله، حيات و شريعت گورونديگندن او ذات شيمدى اولسه ده، اوچ مسئلهيى بردن عموم روىِ زمينده وضعيتلرينى