أوت رسالۀِ النورڭ شخصِ معنويسندن گلن شفا دعاسى، اويله يوز بيڭ دوقتوره مقابل گلير دييه بز ده تصديق ايتدك. بو خستهلغڭ ليلۀِ قدرده رسالۀِ النورڭ طلبهلرى، خصوصًا معصوملرڭ ايتدكلرى شفا دعالرى اويله بر درجه خارقه بر صورتده تأثيرينى گوستردى كه، استاديمزه صحّت حالندن داها ايلرى بر صورتده بردن بر وضعيت ويريلدى. ليلۀِ قدره لايق بر طرزده چاليشمغه باشلادى. رسالۀِ النور شاكردلرندن گلن بو دعاىِ شفا، خارقه بر معجزه گبى بر كرامت اولديغنى بز گوزيمزله گوردك.
اوراده بولونان قارداشلريمزه برر برر سلام و عرضِ حرمت ايدر، دعالرينى ايسترز.
بورا رسالۀِ النور شاكردلرندن قارداشڭز
أمين، محمد فيضى
* * *
﴿بِاسْمِهٖ سُبْحَانَهُ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ﴾
عزيز، صدّيق، مبارك قارداشلرم و خدمتِ قرآنيهده چاليشقان و قوّتلى آرقداشلرم و طريقِ حقده و برزخ سياحتنده و آخرت يولنده نورانى يولداشلرم!
سزڭ بايرامڭزى، ليلۀِ قدريڭزى، رمضانِ شريفده مقبول دعالريڭزى بتون روح و جانمله تبريك و تسعيد ايدييورم. جنابِ حق بو بايرامڭ سرورينى، حقيقى و گنيش و عمومى سروره مقدّمه و وسيله أيلهسين، آمين.