﴿بِاسْمِهٖ سُبْحَانَهُ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ﴾
عزيز، صدّيق قارداشلرم!
بو دفعه بنى چوق مسرور ايدن و شكره سَوق ايدن و بو صيرهلرده حاصل اولان أنديشهمى إزاله ايدن و إسپارطه ولايتى معنوى مدرسة الزهرا اولديغنى و إسپارطه شاكردلرى ثباتده و صداقتده هر يره فائق اولدقلرينى گوسترن، رسالۀِ النور أركانلرندن اوچ درت مكتوب و او مكتوبده إسملرى بولونان خاص قارداشلريمڭ رسالۀِ النوره خدمت و قلملريله يارديم جهتنده بزه گوستردكلرى فداكارانه علوِّ جناب، بويله بر زمانده و بويله بر موسمده غايت پارلاق بر عنايتِ ربّانيه اولديغنه قناعتمز وار.
نور فابريقهسندهكى عليلر و طاهرينڭ ايستدكلرى معجزهلى قرآنمزله إعجازِ قرآن ذيللريله برابر إستانبولده حافظ أمينڭ يانندهدر، اوقوتديرييورلر و يازديرييورلر. ايسترسهڭز بنم نسخهمى حافظ أميندن آليڭز، اونڭ يرينه گوزلجه ذيللى نسخهڭزدن بريسنى ويريڭز، ياننده قالسين. قرآنڭ صوڭ يازيلان نسخهسنى ده لزوم اولديغى و بِالفعل طبع ايتمك ايچون گلديگڭز زمان إستانبوله گوندرهجگم.
خسروڭ اوزون و تأثيرلى و قيمتدار مكتوبى و حاشيهسنده قهرمان رشدينڭ كوچوجك مكتوبى و پك چوق علاقهدار اولديغم أهمّيتلى قارداشلريمزڭ قلملريله بزه يارديملرى و رسالۀِ النورله إشتغالى هر شيئه ترجيح ايتمهلرى و خسروڭ ده متماديًا گلهليدن بَرى چاليشماسى إثبات ايدييور كه؛ إسپارطه تماميله رسالۀِ النوره صاحب اولمش و بر سعيد يرنده، بيڭ سعيدى بولمش. جنابِ حقّه نهايتسز شكر،