قارداشلرم!
بوگونلرده رموزاتِ ثمانيهيه عائد ايكى رسالهيى أهمّيتلى طلبهلره، بر يره گوندردم. يول قپاندى، گيتمهدى. او ايكى رسالهيى تكرار دقّتله مطالعه ايتدم. فكرًا ديدم كه: «بو ذوقلى، گوزل، مراقلى، شيرين بر مقصده گيدن بو توافقلى يولده نه ايچون سوق ايديلمهدن پرده ايندى، باشقه يولده سوق ايديلدك، چاليشديريلدق.»
بردن إخطار ايديلدى كه: «او غيبى أسرارى آچاجق اولان مسلكدن يوز درجه داها أهمّيتلى و قيمتلى و عمومى إحتياجه مدار و هركس بو زمانده اوڭا شدّتله محتاج و إسلاميتڭ تمل طاشلرى اولان حقائقِ ايمانيه خزينهسنه خدمت ايتمگه و إستفادهيه ضرر گلهجكدى. أڭ بيوك و أڭ يوكسك مقصد اولان حقائقِ ايمانيهيى، ايكنجى درجهده براقهجقدى. اونڭ ايچون ايدى.»
سورۀِ (اِذَا جَٓاءَ نَصْرُ اللّٰهِ) رمزنده، أسرارِ غيبيه گوستريلدى؛ بردن قپاندى، پرده ايندى.
هم بو سر ايچوندر كه، او يولده فضله إستخدام ايديلمدك، يالڭز او مسلكِ توافقيهنڭ ترشّحاتندن رسالۀِ النورڭ حقّانيتنه بر إمضا و جزالتنه بر زينت و حروفِ قرآنيهنڭ إنتظامندن و وضعيتلرندن تظاهر ايدن بر نوع إعجاز چيقدى. داها او يولده چاليشديريلمادق.
عموم قارداشلريمزه و رسالۀِ النورده درس آرقداشلريمه برر برر سلام و دعا ايدرز و دعالرينى رجا ايدرز.
* * *