أزجمله: قرآنِ معجز البيانڭ حقّانيتنى إثبات ايدن بتون حجّتلرى، ايكنجى درجهده حشرِ جسمانىيى، بيڭلر آياتِ قرآنيهنڭ تصوير و ايضاحاتلريله إثبات ايدييور. عجبا، قرآنِ معجز البيانڭ معجزانه جنّتڭ لذائذِ جسمانيهسندن بحثلرى و ايضاحلرى درجهسندن داها باشقه بر ايضاحه لزوم قالير مى؟
هم رسولِ أكرم عليه الصلاة والسلامڭ حقّانيتنى إثبات ايدن بتون معجزهلرى، حجّتلرى ايكنجى درجهده حشرِ جسمانىيى و جنّت و جهنّمڭ لذائذ و آلامِ جسمانيسنى خارقه بلاغتيله تصوير و ايضاح ايدييور. و او ايضاحدن صوڭره، داها ايضاحه إحتياج قالير مى؟
هم جنابِ حقّڭ وجوبِ وجودينى و رحيميت و حكيميتنى و علم و قدرتنى و عادليت و حفيظيتنى و صفاتِ قدسيهسنى إثبات ايدن بتون برهانلر، حجّتلر، بر جهتده حشرى إثبات ايتديگى گبى؛ ربوبيتڭ مقتضاسى اولان إرسالِ رسل و إنزالِ كتب جهتيله، هم رسالتِ محمديهيى (عصم) إستلزام هم قرآن، اونڭ قونوشماسى و كلامى اولمديغنى و كلام اللّه اولديغنى إثبات ايتمكله، حشرِ جسمانىيى تفصيلاتيله بو ايكى نقطهدن ينه إثبات ايدييور.
الحاصل: رسالۀِ النورده ايمانِ بِاللّٰه و ايمانِ بِاليوم الآخر اولان ايكى قطبِ ايمانى، تام بربرينه مساوى گلهجك بر درجهده إثبات ايديلمش. يالڭز بو قدر وار كه، حشرِ جسمانى قسمًا صريحًا و قسمًا ضمنى و تبعى إثبات ايديلمش. چونكه بو عالمِ شهادت، صانعنى غايت صريح و ظاهر گوسترييور؛ و حشرى ضمنى و پردهلى خبر ويرر. إن شاء اللّٰه بر زمان، رسالۀِ النورڭ شاكردلرندن بريسى ويا بر قاچ دانهسى، او طوقوز مقامى و براهينى تأليف ايدهجك و مقدّمۀِ حشريهنڭ باشندهكى آياتِ أعظمڭ طوقوز فقرهسنڭ خزينهلرينى، رسالۀِ النورده منتشر حشرِ