بن ده او قارداشمه ديدم كه:
«سن مبالغه ايدييورسڭ. بن اونى گورسهم، چوق مسئلهلرده إلزام ايدهبيليرم. هم سن، بنم قدر اونى حقيقى سومييورسڭ. چونكه كائناتدهكى علوملرى بيلير بر قطبِ أعظم صورتنده تخيّل ايتديگڭ بر ضياء الدينى سوهرسڭ؛ يعنى او عنوان ايله باغليسڭ، محبّت ايدرسڭ. أگر پردۀِ غيب آچيلسه و حقيقتى گورونسه، سنڭ محبّتڭ يا زائل اولور وياخود درتده بريسنه اينر. فقط بن او ذاتِ مباركى، سنڭ گبى پك جدّى سوهرم، تقدير ايدرم. چونكه سنّتِ سنيه دائرهسنده، حقيقت مسلگنده، أهلِ ايمانه خالص و تأثيرلى و أهمّيتلى بر رهبردر. شخصى مقامى نه اولورسه اولسون، بو خدمتى ايچون روحمى اوڭا فدا ايدرم. پرده آچيلسه و حقيقى مقامى گورونسه، دگل گرى چكيلمك، واز گچمك، محبّتده نقصان اولمق؛ بِالعكس داها زياده حرمت و تقدير ايله باغلانهجغم. ديمك بن حقيقى بر ضياء الدينى، سن ده خيالى بر ضياء الدينى سوهرسڭ.» (حاشيه)
بنم او قارداشم إنصافلى و مدقّق بر عالم اولديغى ايچون، بنم نقطۀِ نظريمى قبول ايدوب تقدير ايتدى.
أى رسالۀِ النورڭ قيمتدار طلبهلرى و بندن داها بختيار و فداكار قارداشلرم! شخصيتم إعتباريله سزڭ زياده حسنِ ظنّڭز بلكه سزه ضرر ويرمز. فقط سزڭ گبى حقيقتبين ذاتلر وظيفهيه، خدمته باقوب، او نقطهده باقماليسڭز. پرده آچيلسه، بنم باشدن آشاغىيه قدر قصورات ايله آلوده ماهيتم، بندن قاچمغه بر وسيله اولور.
___
(حاشيه): چونكه سن محبّتڭى اوڭا پك بهالى صاتييورسڭ. ويرديگڭ فيآتڭ يوز دفعه زياده بر مقابل دوشونيورسڭ. حالبوكه اونڭ حقيقى مقامنڭ فيآتنه، أڭ بيوك محبّت ده اوجوزدر.