﴿بِاسْمِهٖ سُبْحَانَهُ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ بِعَدَدِ كَلِمَاتِ الْقُرْاٰنِ وَحُرُوفَاتِهَا﴾
عزيز، صدّيق، مبارك قارداشلرم و خدمتِ قرآنيهده قوّتلى، فعّال، ثباتكار آرقداشلرم!
بوگونلرده بنمله آلتى آدم، باشده مرانغوز أحمد، آخرنده بن، معنوى إخطاره بناءً برر مسئلهيه مدار اولمشز:
برنجيسى: فعّال، جدًّا چاليشقان، رسالۀِ النور و مدرسۀِ نوريه طلبهلرندن مرانغوز أحمدڭ مكتوبنده، أشرف نامنده اون ياشنده بر معصوم چوجغڭ؛ كوينى، مالنى ترك ايدوب، ايكى گون مسافهدن گلوب، هيچ يازى يازماديغى حالده، اون گون ظرفنده رسالۀِ النورى يازمغه موفّق اولماسى، رسالۀِ النورڭ بر كرامتى اولديغى گبى، مدرسۀِ نوريهنڭ ده خارقه بر چيچگيدر دينيليور.
أوت بز ده ديرز كه: مادّى بر قيشده گوزل چيچكلرڭ آچيلمهسى، بر خارقۀِ قدرت اولديغى گبى؛ بو عصرڭ معنوى و دهشتلى قيشنده، صاوه قريهسنڭ، يعنى صاوه شجرهسى بيڭ گوزل چيچكلر و جنّت ميوهلرى آچماسى و إسپارطه مملكت باغچهسى، بيڭلر گُلِ محمّدى (عصم) چيچكلرى آچماسى؛ (حاشيه) ألبته خارقه بر معجزۀِ رحمت و بو مملكته خارقه بر كرامتِ عنايتِ ربّانيه و رسالۀِ النور طلبهلرينه خارق العاده بر إكرامِ إلٰهيدر دييه إعتقاد ايدوب، جنابِ حقّه حدسز شكر ايدرز.
___
(حاشيه): و هر برى «صد برق» اولارق، يعنى هر بر چيچكده يوز پارچه ياپراق.