هم عاطفڭ پارلاق خدمتى توقّفه اوغراماسى (حاشيه) و گريلهمسى؛ و مرحوم محمد زهدى بدوينڭ يوكسك و گنيش خدمتنڭ پردهلنمهسنى دوشونمسى بنى زياده محزون ايتديگى هنگامده، أليمه بر مكتوب ويريلدى. او مكتوب، او أنديشهمى إزاله ايتدى. رسالۀِ النور خدمتنده بر قپو قپانسه، داها مهم قپولر آچيلير، دييه قاعده ينه حكمنى إجرا ايتدى كه؛ صبرى گبى رسالۀِ النورڭ غايت بيوك بر ركننڭ بيوك عموجهسى و رسالۀِ النورڭ بر قهرمانى اولان طاهرينڭ أنيشتهسى و رسالۀِ النورڭ صفِّ أوّلنده و شاكردلرينڭ باشنده بر زمان ناظرلق وظيفهسنى گورن و شيمدىيه قدر ده رسالۀِ النور حقّنده قلبنى بوزميان بيوك حافظ زهدينڭ صميمى كمالِ صداقت و إخلاصى گوسترن مكتوبيله؛ و خلوصئِ ثالث عبد اللّٰه چاوشڭ حاشيهسنده تصديقله، بو أسكى و يڭى غيّور قارداشمز بيوك زهدى، رسميته باقميهرق، رسالۀِ النورڭ مهم وظيفهلرندن اولان معصوملره قرآن درسنى ويرمكله گوستريلدى كه؛ مرحوم زهدى بدوى يرينه، بو بيوك زهدىيى يڭى ويرييور. و عاطفڭ توقّفى يرينه، بو مدقّق و مقتدر و خطيب بيوك حافظ زهدىيى فعاليته گتيردى. جنابِ حقّه شكر ايدييورز. بوگوندن إعتبارًا، رسالۀِ النورڭ خاص شاكردلرى ايچنده شركتِ معنويۀِ نوريهدن حصّهدار اولماسنى و إسميله دعايه گيرديگنى سلاممله برابر تبليغ ايديڭز.
* * *
___
(حاشيه): شيمدى آلديغمز خبر: دڭزلى واليسى، أهمّيتلى بر شيفره ايله بورانڭ واليسنه، عاطف مسئلهسنى إعظام ايدهرك شيفره يازمش. حافظِ حقيقينڭ حفظنه طايانوب تلاش ايتمهيڭز، فقط إحتياط ايديڭز. حپس اولان عاطف و آرقداشلرينه تسلّى ويريڭز. و مراق ايتمهسينلر، اللّٰه كريمدر و رحيمدر.