(اوتوز بر، اوتوز ايكنجى آيتلرڭ رسالۀِ النوره إشارتلرينى إستخراج ايتمگه موفّق اولان أحمد نظيف و اوغلى صلاح الدين، رسالۀِ النورڭ أهمّيتلى شاكردلرندن اولديغندن، صلاح الدّينڭ شو فقرهسى، يگرمى يدنجى مكتوبڭ فقرهلرى ايچنه گيرمگه لايقدر.)
(١٣٥٨) سنهسى دانيزيقدن چيقان بر قيويلجيم آوروپا ايچريسنه سرعتله ياييلارق بيوك بر يانغين حالنى آلديغندن، بتون ملّتلر سفرى وضعيتنده بولونديغندن توركيه ده قسمى سفربرلك ياپدى. (١٣٥٩)ده ٢٧، ٢٨، ٢٩ طوغومليلرى سلاح آلتنه آلدى. بو ميانده، رسالۀِ النور طلبهلرندن محمد فيضى و بن گبى كوچك طلبهلر ده، بر حكمته بناءً عسكره آلينمشدى. (حاشيه) استاديمز، يالڭز
___
(حاشيه): فيضىنڭ و صلاح الدّينڭ عسكر اولماسى طولاييسيله استاد خفيف تبسّم ايدهرك: «سزى اونلر آلامازلر. وظيفهڭز وار، دعوت ايديلييورسڭز. چونكه لسانله اولماسه ده حال و أطواريڭز او وظيفهيى گورهجكدر.» ديدى. حقيقةً صلاح الدين عسكر اولديغنده مبارك رمضانده إزميتڭ طاوشان تپهسنده هوانڭ مساعدهسزلگنه رغمًا ينه جماعتله تراويح نمازى قيلديرمسى و آلايڭ خادم كوينه قالقمهسى رمضانڭ ٢٧، ٢٨، ٢٩ نجى گونلرينه تصادف ايتمهسى طولاييسيله اوروج و نمازينى واپورده، قدر گيجهسنى ده خادم كوينده ايستاسيون رامپاسنده، ياغمورلى صوغوق بر هواده مشكلاتله بولديغى صو ايله آبدست آلوب، صندوق قپاغى اوستنده قيلمسى و گيجهيى يوك واغونلرى ايچنده آجى بر وضعيتده شكرلرله گچيرمسى، سائر نفراتدهكى حسِّ ديانتى هيجانه گتيرييوردى، بر درس حكمنه گچردى. و بالابان كوينده بايرام نمازندن أوّل عسكرى و سيويل أشخاصه، كوى جامعنده نماز حقّنده دردنجى سوزى عينًا اوقوماسى و رسالۀِ نورله وعظده بولونماسى؛ قارداشم فيضى دخى عينًا بولونديغى قطعهده داها تأثيرلى بر طرزده، معنوى لسانِ حال و قال ايله درس ويرمهسى، بِالفعل استادينڭ نطقنى تصديق ايدر. ٢٧، ٢٨، ٢٩ تاريخى، مبارك گونلرڭ أڭ مشقّتليسى ايدى. توركيهده (١٣٥٩) ده ٢٧، ٢٨، ٢٩ قرعهلرى عسكره آلينمشدى. بو توافق دخى، كرامته بر لطافت قاتار.
صلاح الدين