شكلده گورمشز. شويله كه: حپسخانهده بر تك أكمك، سكز و بعضًا اون گون بڭا كافى گلديگى حالده، بوراده عينًا او طرزده يشايوردم. هم بن، هم قارداشلرم، بونى بنم آز يمك و إشتهاسزلغمه ويرييوردق. حالبوكه چوق أمارهلرله قطعيًا آڭلادق كه، او عجيب حال بركت نتيجهسى ايمش. بر قاچ دفعه سكز گونده بڭا كافى گلن بر أكمگى عين إشتها ايله (چاليشماديغمدن بركته مظهر اولمديغم زمان) ايكى گونده، بعضًا بر بچق گونده بيتيرييوردم. ديمك بو اون آلتى اون يدى سنهدن بَرى بنم مكمّل تعييناتم، رسالۀِ النورڭ خدمتندن گلن بر بركتدن ايدى.»
أوت عين اليقين درجهسنده بزه ده قناعت گلمش كه، بو كثرتلى حادثاتِ بركت، قرآنِ معجز البيانڭ إعجازِ معنويسنڭ بر شعاعيدر. معنًا دير: «أى قرآنڭ شاكردلرى! سزلرى وظيفۀِ مقدسهڭزدن أكثريتله گرى بيراقان، معيشت تلاشهسيدر. بو ايسه، قرآنڭ فيضيله، بركت نوعندن سزه ويريلييور. وظيفهڭزه باقڭز.»
(اَللّٰهُمَّ يَسِّرْلَنَا خِدْمَةَ الْقُرْاٰنِ بِنَشْرِ رَسَائِلِ النُّورِ بِحُرْمَةِ اِسْمِكَ الْاَعْظَمِ وَ حَبٖيبِكَ الْاَكْرَمِ اٰمٖينَ)
هم حادثاتِ بركتڭ عين زماننده، رسالۀِ النورڭ بر كرامتى اولارق، بر شاكردينڭ بيڭلرجه ليرا قيمتنده خانهسنى، اوڭا پك ياقين دهشتلى بر يانغيندن فوق المأمول بر صورتده رسالۀِ النورڭ بركتيله قورتولماسى و رسالۀِ النور ترجماننه آخرت جهتنده چوق علاقهدارلق گوسترن بر خانم، او دهشتلى يانغينده يانان خانهنڭ اوچنجى قاتنده بولونان ألماس و مجوهرات و آلتونلرينى قورتارمق ايچون قوشوب چيقديغى وقت، آتش هر طرفى صارمش، مجوهراتنى قورتارهمديغى گبى، كندى نفسنى ده بتون بتون تهلكۀِ قطعيهده گورديگى دقيقهده، رسالۀِ النور