استادڭ تلاشلى اولديغنى حسّ ايدر. استاد، اونڭ نظرينى اوتهكى حادثۀِ بدنيهيه چويرر، اوڭا دير: «گورويورسڭ كه بن معذورم، زيارتى باشقه گونه بيراق.» او ده دونر، گيدر. هم محمد فيضى، هم هجماتِ ستّه، هم باشقه ايشلريمز او تجسّسدن قورتولدى.
أوت هجماتِ ستّه صاقلانديغى معيّن يرنده فوق العاده بر صورتده غائب اولماسى، أهمّيتلى بر حادثهنڭ ئوڭنى آلدى. استاده عارض اولان بو خلافِ عادت حالت و او رسالهنڭ معيّن يرنده بولونمامسى، قطعيًا تصادفه حمل ايديلمز. بر هفته صوڭره او رسالهيى خلافِ مأمول بر يرده بولدق. استاديمڭ أمريله أمين قارداشمه أهمّيتلى بر صورتده اوقودم. استاد بزه ايضاحات ويرييوردى. او وقته قدر بويله مهم و تأثيرلى درس آلمامشدق. ديمك بو ايكى مهم سرّه بناءً رساله كندينى گوسترمدى. ايشته بو حادثه رسالۀِ النورڭ إخلاصلى و صادق شاكردلرى هر وقت بر حفظ و عنايت آلتنده و دائما حمايت آلتنده اولدقلرينه شبهه بيراقمهيور.
اوچنجيسى: استاديمزڭ بر اوقّه (يعنى كيلو) پينيرى واردى. أكثر گونلرده او پينيردن خوشنه گيتديگى ايچون، بر ايكى دفعه ييوردى. هم بزه ده ييديرييوردى. هم ييمكسز اولديغى أكثر وقتلرده اوندن يديگى حالده، آلتى آى قدر دوام ايتديگنى و حالاً ده، يوز درهم قدر او پينيردن بولونديغنى، بن (يعنى دائمى خدمتجيسى أمين) و بن (يعنى طلبهسى و خدمتجيسى كوچك خسرو) يقينًا گوروب تصديق ايدييورز. فقط بو حادثۀِ بركتڭ إفشاسندن صوڭره، أوّلجه گورونمهين ديبى گورونمگه باشلادى، نقصانيتنى گوستردى. أوت، بركت خصوصنده شايانِ حيرت بر حادثهدر. هم ياريم كيلو بر ترهياغى، أكثر گونلرده فضلهجه صرف اولديغى حالده، أللى گونه ياقين دوامى، شبههسز بر بركت ايچنه گيرمش.