كائناتڭ فوقنده گورديگمدن و إعتقاد ايتديگمدن، دگل كُرۀِ أرضدهكى جريانلره، بلكه بڭا ويريلسه ده، بتون دنيا سلطنتنه ده آلَت ايدهمم. بن، يالڭز حقيقتجى و ايمانجى و قرآنجى رسالۀِ النورڭ بر خادمىيم. قاچ سنهدر بتون بو هجوملريله برابر، ايكى أثرِ عنايت وار:
بريسى: رسالۀِ النورڭ نشرياتندهكى خدمتمه ضرر ويريلمديگى گبى، فوق المأمول موفّق اولدق.
ايكنجيسى: هر نه وقت شدّتلى هجوم ايديلهجگى زمان، استاديمزدن «دقّت» أمرينى آلييوردق. هم ده رسالۀِ النورڭ آشكار بر كرامتندندر كه، بيڭ اوچ يوز أللى طوقوز (١٣٥٩) سنۀِ هجرى رمضانِ شريفڭ اون ويا اون ايكنجى گونلرنده (اللّٰه رحمت ايتسين) وفات ايدن قارداشلريمزدن خطيب محمد نامندهكى ذات، يگرمى آلتنجى لمعه اولان إختيارلر رسالهسنى يازاركن خسته اولارق يازمغه قادر اولماديغندن (لَا اِلٰهَ اِلَّاهُوَ) كلمۀِ توحيدى يازهرق بيراقديغى، زيارتنه گلن ديگر قارداشمز و فعّال آرقداشمز، فيضى محمد أفندىيه إكمالنى رجا ايدهرك دنيايه وداع و أبدى حياتنه، إن شاء اللّٰه بو كلمۀِ طيّبه ايله حياتنڭ صوڭنى مهرليهرك ايمانلى اولارق قبره گيرديگنى إظهار و رسالۀِ النورڭ طلبهلرينه آچيق بر مژده و تبشيراتده بولونمشدر.
إشاراتِ قرآنيهنڭ يگرمى آلتنجى آيتنڭ (فَفِى الْجَنَّةِ خَالِدٖينَ) سرّيله، «رسالۀِ النور طلبهلرى، ايمان ايله قبره گيرهجكلردر» تبشيراتنڭ صدقنى گوسترن بو آچيق كرامتڭ و تبشيراتِ عظيمهنڭ بتون قارداشلريمزه تعميم اولونماسنى، رسالۀِ النورڭ درجۀِ علويتنى و خادملرينڭ مكافاتلرينڭ نه زمان و نه صورتله ويريلمكده اولديغنى عين اليقين بيلينمك و گورولمك اوزره، شو حقيقت موافق ايسه إشاراتِ قرآنيه رسالهسنه تحشيه اولونماسنى رجا ايدرم، قيمتلى استادم.
رسالۀِ النور شاكردلرندن
أحمد نظيف چلبى
* * *