فيضىنڭ مكتوبنده بحث ايديلمهسى، صِرف حسنِ نيت و فرطِ مربوطيت و صداقتدن و إخلاصدن طوغمشدر.
بو إظهارڭ خطاسندن حادث اولان مشغوليتڭزه سببيت ويرديگمدن چوق متأثّر اولدم. عفو بيوريڭز. ايقاظ و إرشاد ايديجى نعمت و همّتِ عتابڭزله عفو بيوريلماسنى و رسالۀِ النورڭ معنوى طوقاتلرندن محافظه ايديلمكلگمزى كمالِ خلوصله إسترحام أيلرم.
عزيز و قيمتلى استادم! جنابِ حقّڭ لطف و كرميله و حدسز إحسانيله، إنتسابًا خدمتِ قدسيهسنده بولونديغم رسالۀِ النورڭ مادّى و معنوى پك چوق كرامتلرينى و بركتلرينى عين اليقين گورمش و لذّتنى طاتمش اولان بو عاجز خدمتكاريڭزڭ نقصانلرينى حسنِ نيته و خلوصِ قلبنه باغيشلامڭزى رجا ايدركن، بو مبارك رسالۀِ النورڭ پك چوق كرامتلرندن بر قاچنى عرض ايدييورم. شويله كه:
رسالۀِ النورڭ ترجمانى و مؤلّف و صاحبى بولونان ذات، بيڭ اوچ يوز يگرمى درت (١٣٢٤) و يگرمى بش (١٣٢٥) رومى سنهلرنده، إستانبولده إشتهارله «بديع الزمان» نامى و لقبى آلتنده مطبوعاتڭ ستايشله نشرياتندن متحسّس اولارق، او زمان اون يدى ياشمده بولونديغم و چوق جاهل و چوجقلق دورهسنده ايكن، بو مبارك إسم قلبمده ير طوتمش. و بو قلبى محبّت حرمتى ايچون اولاجق كه؛ بيڭ اوچ يوز يگرمى آلتى (١٣٢٦) سنهسنده حضرتِ استادڭ «بديع الزمان سعيدِ كردى» لقبى آلتنده قره دڭز سياحتنده ايكى خدمتكارى ايله اينهبولىيى زيارت ايدهرك، او زمان اينهبولينڭ مشهور علماسندن حاجى ضيا و ديگر علما آراسنده واپوره تشييع ايديلديگى صيراده تصادفًا چارشوده قارشيلاشديغم و چوق درين محبّت حسّيله بو مبارك ذاته سلام طورارق متبسّم و نورانى سيمالريله و كسكين نظرلريله سلاملرينه و معنوى نظرلريله إلتفاتلرينه مظهر اولديغم گوندن بَرى آرتان محبّت و علاقهمى، اوتوز سنهلك خاطرمدن قطعيًا سيلنمديگنى عين اليقين گورويوردم.