ذوقلره غرق ايدر. فقط او قولاق، كفر ايله طيقانديغى زمان، او لذيذ، معنوى يوكسك صوتلردن محروم قالير. و او لذّتلرى ايراث ايدن آوازلر، ماتم سسلرينه إنقلاب ايدر. قلبده، او علوى حزنلر يرينه، أحبابڭ فقدانيله أبدى يتيملكلر، مالكڭ عدميله نهايتسز وحشتلر و صوڭسز غربتلر حاصل اولور. بو سرّه بناءًدر كه، شريعتجه بعض صوتلر حلال، بعضلرى ده حرام قيلنمشدر. أوت علوى حزنلرى، ربّانى عشقلرى ايراث ايدن سسلر، حلالدر. يتيمانه حزنلرى، نفسانى شهواتى تحريك ايدن سسلر، حرامدر. شريعتڭ تعيين ايتمديگى قسم ايسه، سنڭ روحنه، وجداننه ياپديغى تأثيره گوره حكم آلير.
(وَعَلٰٓى اَبْصَارِهِمْ غِشَاوَةٌ) بو جمله ايله رؤيته، يعنى گوزه عائد بيوك بر نعمتِ بصريهنڭ كفر ايله غائب اولديغنه إشارت ايديلمشدر. زيرا گوزڭ نورى، نورِ ايمانله ايشيقلانيرسه و قويلشيرسه، بتون كائنات گُل و ريحانلر ايله مزيَّن بر جنّت شكلنده گورونور. گوزڭ گوز ببگى ده، بال آريسى گبى، بتون كائنات صفحهلرنده منقوش گُل و چيچك گبى دليللرندن، برهانلرندن آلاجغى عبرت، فكرت، اُنسيت گبى عصاره و شيرالرندن وجدانده او طاتلى، ايمانلى باللرى ياپاجقدر. أگر او گوز كفر ظلمتيله كور اولورسه؛ دنيا، گنيشلگيله برابر بر حپسخانه شكلنه گيرر. بتون حقائقِ كونيه، نظرندن گيزلهنير. كائنات اوندن توحّش ايدر. قلبى أحزان و أكدار ايله طولار.
(وَلَهُمْ عَذَابٌ عَظٖيمٌ) جملهسيله، كفر شجرهسنڭ آخرته عائد زقّوم گبى ثمرهسنه إشارت ايديلمشدر. (لَا يُؤْمِنُونَ) كلمهسى ايسه، إنذار ايله عدمِ إنذار آراسندهكى مساواته نصّ ايدهرك (سَوَٓاءٌ) كلمهسنه تأكيددر.
* * *