(يُفْسِدُ) : فسادڭ عصيانه بدل ذكرى، عصيانلرينڭ نظامِ عالمڭ فسادينه سبب اولاجغنه إشارتدر. دوام ايله تجدّدى إفاده ايدن مضارع صيغهسيله فسادڭ ذكر ايديلمهسى، ملائكهنڭ أصل ايستهمدكلرى و إنكار ايتدكلرى، آنجق عصيانلرينڭ دوام و إستمرار ايله وقوعه گلهجگنه عائد اولديغنه إشارتدر. ملائكه بشرڭ عصيانلرينڭ دوام و إستمرارينى، يا جنابِ حقّڭ إعلاميله بيلمشلردر ويا لوحِ محفوظه باقوب اوندن آلمشلردر وياخود إنسانلردهكى قوّۀِ غضبيه و شهويهدن آڭلامشلردر.
(فٖيهَا) : قوّۀِ شهويه ايله أرضده فساد حاصل اولور، قوّۀِ غضبيهنڭ تجاوزيله قتل و قتاله محل اولور. حالبوكه أرض، تقوا اوزرينه تأسيس ايديلمش بر مسجد حكمندهدر.
(و) ايسه فساد ايله سفك گبى ايكى رذيلهيى بربرينه عطف و جمع ايدر. چونكه فساد، سفكِ دمايه سببدر.
(يَسْفِكُونَ) نڭ (يَقْتُلُونَ) يه ترجيحًا ذكرندن آڭلاشيلييور كه؛ سفك، ظلمًا ياپيلان قتلدر. بو ايسه فساده داها مناسبدر. چونكه قتلڭ إفاده ايتديگى معنا، قتلڭ مباح قسمنه ده شاملدر. جهادده ويا بر جماعتى قورتارمق ايچون ياپيلان قتللر گبى كه؛ بو قتل، فساده مناسب اولماز.
(اَلدِّمَٓاءَ) : سفك كلمهسنڭ دلالت ايتديگى إراقۀِ دمدهكى دمى تأكيددر.
(وَنَحْنُ نُسَبِّحُ بِحَمْدِكَ وَنُقَدِّسُ لَكَ) : بشرڭ جعلندهكى حكمتى صوران ملائكهيه، صانكه شويله بر إعتراض وارد اولمشدر: «بشرڭ اللّٰهه ياپاجغى