س - (اَحْيَاكُمْ) ڭ يرينه نه ايچون (صِرْتُمْ اَحْيَاءً) دينيلمهمشدر؟
ج - (اَحْيَاكُمْ) ، حياتڭ جنابِ حق طرفندن إعطا ايديلديگنه صراحةً دلالت ايدر. (صِرْتُمْ اَحْيَاءً) ده او دلالت يوقدر. يالڭز «حيات صاحبى اولديڭز» معناسنه دلالت ايدر.
(ثُمَّ يُمٖيتُكُمْ) : بونڭ يرينه (تَمُوتُونَ) ذكر ايديلمهمسى؛ موتڭ، قدرڭ تقديريله، قدرتڭ بيوك بر تصرّفى اولديغنه إشارتدر. أوت عمرِ طبيعيسنى بيتيروب صوڭره ئولنلر پك آزدر. قسمِ أعظمى، عمرِ طبيعيسى أثناسنده ئولورلر. ديمك موت، طبيعى بر نتيجه دگلدر؛ آنجق جسدڭ إنحلاليله طاغيلماسندن عبارتدر، يوقسه روحڭ فناسيله دگلدر. موت ايله جسد طاغيلير، روح باقى قالير.
(ثُمَّ يُحْيٖيكُمْ) : ماقبليله مابعدى آراسنده بُعْدِ مسافهيى إفاده ايدن (ثُمَّ) ، إماته ايله ايكنجى إحيا آراسنده قوجهمان عالمِ برزخڭ فاصله اولديغنه إشارتدر.
(ثُمَّ اِلَيْهِ تُرْجَعُونَ) : بو (ثُمَّ) ايسه، ايكنجى إحيا ايله رجوع آراسنده موجود بيوك بر پرده و حجابڭ بولونديغنه إشارتدر.
(تُرْجَعُونَ) يعنى: أسباب پردهسنڭ كشفى ايله، وسائطڭ طرديله اللّٰهه رجوع ايدهجكسڭز.