مادونى اولان شيلر. فقط (مَا فَوْقَهَا) تعبيرى، كوچك شيئڭ بلاغتجه داها غريب، خلقتجه داها عجيب اولديغنه إشارتدر.
﴿فَاَمَّا الَّذٖينَ اٰمَنُوا فَيَعْلَمُونَ اَنَّهُ الْحَقُّ مِنْ رَبِّهِمْ وَاَمَّا الَّذٖينَ كَفَرُوا فَيَقُولُونَ مَاذَٓا اَرَادَ اللّٰهُ بِهٰذَا مَثَلًا﴾
بو جملهنڭ أوّلكى جملهدن تفرّع و تشعّب ايتديگنى إفاده ايدن (ف) ، بو جملهيى هر ايكى شقّيله إنتاج ايدن ضمنى و گيزلى بر دليله إشارتدر. تصويرى شويله اولسه گركدر:
جنابِ حق، تمثيلى ترك ايتمز. زيرا بلاغتڭ إقتضا ايتديگى بر تمثيلدر. بلاغتڭ إقتضا ايتديگى شى ترك ايديلمز. اويله ايسه جنابِ حق بو تمثيلى ترك ايتمز. بناءً عليه إنصافى اولان، او تمثيلڭ بليغ، حق و اللّٰهدن اولديغنى بيلير. عناد ايله باقان آدم ايسه حكمتنى بيلمز، تردّده دوشر، صورار، سؤال ايدر، أڭ نهايت إستحقار ايله إنكاره گيرر. خلاصه: مؤمن، إنصافلى اولديغى ايچون اللّٰهدن اولديغنى تصديق ايدر. كافر اولان آدم عنادجى اولديغندن، «بونده نه فائده وار؟» دير.
(اَمَّا) : بو (اَمَّا) شرط أداتيدر. داخل اولديغى هر ايكى جملهيى برنجيسى ملزوم، ايكنجيسى لازم؛ ويا أوّلكيسى شرط، ئوتهكيسى مشروط اولمق اوزره، ايكنجيسنى برنجى ايله باغلار. أوت بو (اَمَّا) ، ايكى جمله آراسنده لزومى تأسيس ايتمك ايچون وضع ايديلمشدر. بناءً عليه بوراده (فَيَعْلَمُونَ اَنَّهُ الْحَقُّ) جملهسنڭ (اَلَّذٖينَ اٰمَنُوا) جملهسنه لازم و ضرورى اولديغنه دلالت ايدر. يعنى ايمانى اولانڭ شأنى، اونڭ حق اولديغنى بيلمكدر.