أبديهدن چيقوب ترك ايتمكدر. فسقڭ منشئى؛ قوّۀِ عقليه، قوّۀِ غضبيه، قوّۀِ شهويه دينيلن اوچ قوّتڭ إفراط و تفريطندن نشئت ايدر. أوت إفراط ويا تفريط، دليللره قارشى بر عصياندر. يعنى صحيفۀِ عالمده ياراديلان دلائل، عهودِ إلٰهيه حكمندهدر. او دلائله مخالفت ايدن، جنابِ حقله فطرةً ياپمش اولديغى عهدينى بوزمش اولور. و كذا إفراط و تفريط حياتِ نفسيه و روحيهنڭ مرض و خستهلغنى إنتاج ايدن أسبابدندر. بوڭا فسقڭ برنجى صفتى اولان (يَنْقُضُونَ عَهْدَ اللّٰهِ) جملهسيله إشارت ايديلمشدر. و كذا إفراط و تفريط، حياتِ إجتماعيهيه قارشى عصيان آتشنى ياقان ايكى عاملدر. أوت بو عامللر حياتِ إجتماعيهيى نظام و إنتظام آلتنه آلان رابطهلرى، قانونلرى كسر آتار. أوت شهوت ويا غضب حدّينى آشارسه، عِرض و ناموسلر پايمال اولور، معصوملر محو اولور. بوڭا ده، فسقڭ ايكنجى صفتى اولان (وَيَقْطَعُونَ مَٓا اَمَرَ اللّٰهُ بِهٖٓ اَنْ يُوصَلَ) جملهسيله إشارت ايديلمشدر. و كذا دنيا نظامنڭ بوزولماسنى إنتاج ايدوب فساد و إختلاله سببيت ويرن ايكى إختلالجيدرلر. بوڭا دخى، فسقڭ اوچنجى صفتى اولان (وَيُفْسِدُونَ فِى الْاَرْضِ) جملهسيله إشارت ايديلمشدر. أوت فاسق اولان كيمسهنڭ قوّۀِ عقليه و فكريهسى إعتدالى غائب ايدوب سفسطهلره دوشرسه، إعتقاداته عائد رابطهلرى كسمكله، حياتِ أبديهسنى ييرتار آتار. و كذا قوّۀِ غضبيهسى حدِّ وسطى تجاوز ايدرسه، حياتِ إجتماعيهنڭ هم يوزينى، هم آستارينى ييرتار، آلت اوست ايدر. و كذا قوّۀِ شهويهسى حدّى آشارسه هواءِ نفسه تابع اولور، قلبندن شفقتِ جنسيه زائل اولور، كنديسى برباد اولاجغى گبى باشقهلرينى ده برباد ايدهجكدر. بو إعتبارله فاسقلر هم نوعنڭ ضررينه، هم أرضڭ فسادينه چاليشمش اولور.