أوّلكى آيتده عبادته أمر ايديلديگنده، «عبادت ناصلدر؟» دييه وارد اولان سؤاله جوابًا: «قرآنڭ تعليم ايتديگى گبى» دينيلدى. «قرآن اللّٰهڭ كلامى ميدر؟» دييه ايديلن ايكنجى سؤاله جوابًا (وَاِنْ كُنْتُمْ فٖى رَيْبٍ... إلٰى آخر) ، دينيلدى. ايشته هر ايكى جمله آراسنده بو صورتله مناسبت تظاهر ايدر و حرفِ عطفڭ ده مقتضاسى يرينه گلير.
س - (اِنْ) شكّ و تردّدى إفاده ايدر. (اِذَا) ايسه، جزم و قطعيته دلالت ايدر. اونلرڭ شكّ و ريبلرى، قرآن حقّنده قطعيدر. بناءً عليه مقامڭ إقتضاسى خلافنه (اِنْ) كلمهسنڭ (اِذَا) كلمهسنه ترجيحًا ذكرنده نه گبى بر إشارت واردر؟
ج - أوت اونلرڭ شكّ و ريبلرينى إزاله ايدهجك أسبابڭ ظهورندن طولايى، او گبى شبههلرڭ وجودينه قطعيتله حكم ايديلهميهجگنه، آنجق او شكلرڭ وجودينه ينه شكّ و شبهه ايله حكم ايديلهبيلهجگنه إشارتدر.
إخطار:
(اِنْ) كلمهسنڭ إفاده ايتديگى شكّ و تردّد، اُسلوبڭ إقتضاسنه گورهدر. حاشا متكلّمه عائد دگلدر.
(اِنْ كُنْتُمْ فٖى رَيْبٍ) ايله (اِنِ ارْتَبْتُمْ) جملهلرى بر معنايى إفاده ايتدكلرى و ايكنجى جمله، برنجى جملهدن قيصه اولماسى اسلوبه داها اويغون اولديغى حالده، برنجى جملهنڭ ايكنجى جملهيه ترجيحًا ذكرى، اونلرڭ ريبلرينڭ منشئى؛ خسته طبيعتلريله، كوتو وجودلرى اولديغنه إشارتدر.
س - اونلر ريبلره ظرف و محل اولدقلرى حالده، اونلرى مظروف، ريبى اونلره ظرف گوسترمك نهيه بناءًدر؟