س - جهنّم شيمدى موجود اولديغى تقديرده، يرى نرهدهدر؟
ج - بز أهلِ سنّت و الجماعت الآن جهنّمڭ وجودينه إعتقاد ايدييورز، امّا يرينى تعيين ايدهمييورز.
س - بعض حديثلرڭ ظاهرينه گوره، جهنّم تحت الأرضدر؛ يعنى يرڭ آلتندهدر. و كذا بر حديثه نظرًا، جهنّم آتشنڭ دنيا آتشندن ايكى يوز درجه فضله حرارتى واردر. بو نقطهلرڭ ايضاحى؟
ج - كرهنڭ تحتى، مركزندن عبارتدر. بوڭا بناءً أرضڭ تحتى، مركزيدر. نظرياتِ حِكَميهجه ثابت اولديغى وجهله، أرضڭ مركزنده، حرارتى ايكى يوز بيڭ درجهيه بالغ بر آتش واردر. چونكه هر اوتوز اوچ ذراع درينلگنده، تخمينًا بر درجه حرارت آرتار. بوڭا بناءً مركزه قدر ايكى يوز بيڭ درجهلى بر حرارت ميدانه گلير. ايشته بو نظريهيه، مذكور حديثڭ مئالى مطابق گلير. بوڭا بناءً كُرۀِ أرضڭ مركزنده بولونان ايكى يوز بيڭ درجه حرارتلى بر آتش، جهنّمه بر چكردك حكمنده اولوب، قيامتده قبوغى حكمنده بولونان طبقۀِ ترابيهيى چاتلاتوب، بتون دهشتيله چيقار، توسّع ايتمگه باشلار و تام تجهيزاتيله جهنّم ميدانه گلير، دينيلهبيلير. و كذا بر حديثه نظرًا، «زمهرير» نامنده، برودت ايله ياقان بر آتش واردر. بو حديث ده، او نظريهيه مطابقدر. زيرا مركزِ أرضدن سطحنه قدر درجه درجه آرتان ويا تناقص ايدن آتش، زمهرير ده داخل اولمق اوزره آتشڭ بتون مرتبهلرينه شاملدر. حكمتِ طبيعيهده تقرّر ايتديگى گبى، آتش بعضًا اويله بر درجهيه گلير كه، ياقيننده بولونان شيلردن حرارتلرى تمامًا جلب و جذب ايتمكله، اونلرى برودت ايله ياقار و صويى إنجماد ايتديرر.
س - مذكور حديثه گوره؛ جهنّم أرضڭ مركزندهدر. حالبوكه أرض، جهنّمه نسبةً بر يمورطه قدردر. او قوجهمان جهنّم، أرضڭ قارننده ناصل يرلشير؟