اوچنجى طريق: بلاغت إماملرندن مشهور جاحظڭ تحقيقاتنه گوره: عرب أديب و بليغلرينڭ حضرتِ محمّد عليه الصلاة والسلامڭ دعواسنى قلم ايله إبطال ايتمگه، تعريفه گلمز درجهده إحتياجلرى واردى. و او حضرته قارشى اولان كين، عداوت و عنادلريله برابر؛ أڭ قولاى، أڭ ياقين، أڭ سليم اولان قلم و يازى ايله معارضهيى ترك و أڭ اوزون، أڭ مشكل، أڭ تهلكهلى و شبههلى سيف و حرب ايله مقابلهيه مجبورًا إلتجا ايتديلر. صورتِ قطعيهده بوندن آڭلاشيلدى كه، قرآنڭ بڭزرينى ياپمقدن عاجز قالمشلردر. زيرا هر ايكى يولڭ آراسندهكى فرقى بيلمهينلردن دگلديلر. بناءً عليه برنجى يول إبطالِ دعوا ايچون داها مساعد ايكن اونى ترك ايدوب، هم ماللرى، هم جانلرى تهلكهيه آتان باشقه بر يوله سلوك ايدن يا سفيهدر (حالبوكه مسلمان اولدقدن صوڭره سياستِ عالمى ألنه آلانلره سفيه دينيلهمز) ويا برنجى يوله سلوكدن كنديلرينى عاجز گورمشلردر. اونڭ ايچون قلم يرينه سيفه مراجعت ايتمشلردر.
س - قرآنه بر نظيره ياپمق ممكناتدن ايمش، فقط ناصلسه ياپيلمامشدر؟
ج - ممكناتدن اولمش اولسيدى، طمارلرينه طوقونديريلانلر، بهمهحال معارضهيى آرزو ايدرلردى. و معارضه آرزوسنده بولونمش اولسيديلر، معارضه ياپاجقلردى. چونكه إبطالِ دعوا ايچون معارضهيه إحتياجلرى پك شديد ايدى. معارضه ايتمش اولسيديلر، گيزلى قالمازدى، تظاهر ايدردى. چونكه تظاهرينه رغبت چوق اولديغى گبى، أسباب دخى چوق ايدى. تظاهر ايتسه ايدى، عالمده شهرت بولوردى. شهرت بولمش اولسيدى، مسيلمهنڭ هذيانلرى گبى بهمهحال تاريخده بولونهجقدى. مادام كه تاريخده بولونمامشدر، ديمك ياپيلمامشدر. مادام ياپيلمامشدر، ديمك قرآن معجزهدر.