إستعدادينه گوره إرشادڭ ياپيلماسى لزومندن و شارعڭ جمهورى إرشاد ايتمكده تعقيب ايتديگى مقصددن غفلتلرى و جهللرى طولاييسيله بعض إنسانلر، قرآن حقّنده چوق شك و شبههلره معروض قالمشلردر. او شك و شبههلرڭ منشئى اوچ أمردر:
١ - دييورلر كه: قرآنده «متشابهات و مشكلات» دينيلن، حقيقى معنالرى آڭلاشيلميان بعض شيلرڭ بولونماسى، إعجازينه منافيدر. زيرا قرآنڭ إعجازى، بلاغت اوزرينه مؤسّسدر؛ بلاغت ده، آنجق إفادهنڭ ظهور و وضوحنه مبنيدر.
٢ - دييورلر كه: ياراديلشه عائد مسئلهلر، مبهم و مطلق بيراقيلمشدر. و كذا كائناته دائر فنوندن پك آز بحث ايديلمشدر. بو ايسه، تعليم و إرشاد مسلگنه منافيدر.
٣ - دييورلر كه: قرآنڭ بعض آيتلرى ظاهرًا عقلى دليللره مخالفدر. بوندن، او آيتلرڭ خلافِ واقع اولدقلرى ذهنه گلييور. بو ايسه، قرآنڭ صدقنه مخالفدر.
او حريفلرڭ زعملرنجه قرآنه بر نقيصه و شك و شبههلره سبب عدّ ايتدكلرى شو اوچ أمر، قرآنِ كريمه بر نقيصه تشكيل ايتمز. آنجق قرآنڭ إعجازينى بر قات داها إثبات ايتمگه و إرشاد خصوصنده قرآنڭ أڭ بليغ بر إفاده ايله أڭ يوكسك بر اسلوبى إختيار ايتمسنه صادق شاهد و قطعى دليلدر. ديمك قباحت، اونلرڭ فهملرندهدر، حاشا قرآنِ كريمده دگلدر.
أوت (وَكَمْ مِنْ عَائِبٍ قَوْلًا صَحٖيحًا § وَاٰفَتُهُ مِنَ الْفَهْمِ السَّقٖيمِ) شاعرڭ ديديگى گبى، فهملرى خسته اولديغندن، صاغلام سوزلرى تعييب ايدييورلر ويا آيى گبى أللرى اوزوم صالقيمنه يتيشهمديگندن، أكشيدر دييورلر. بونلرڭ ده فهملرى قرآنڭ او يوكسك إعجازينه يتيشهمديگندن، تعييب ايدييورلر.