صوڭره او شريعتڭ تأثيرينى، إجراسنى، تطبيقنى تأمين ايدهجك بر مرجع، بر صاحب لازمدر. او مرجع و او صاحب ده، آنجق پيغمبردر. پيغمبر اولان ذاتڭ ده، ظاهرًا و باطنًا خلقه اولان حاكميتنى دوام ايتديرمك ايچون، مادّى و معنوى بر علويته و بر إمتيازه إحتياجى اولديغى گبى، خالق ايله اولان درجۀِ مناسبت و علاقهسنى گوسترمك ايچون ده، بر دليله إحتياجى واردر. بويله بر دليل ده آنجق معجزهلردر.
صوڭره جنابِ حقّڭ أمرلرينه و نهيلرينه إطاعت و إنقيادى تأسيس و تأمين ايتمك ايچون، صانعڭ عظمتنى ذهنلرده تثبيت ايتمگه إحتياج واردر. بو تثبيت ده آنجق عقائد ايله، يعنى أحكامِ ايمانيهنڭ تجلّيسيله اولور. ايمانى حكملرڭ تقويه و إنكشاف ايتديريلمسى، آنجق تكرار ايله تجدّد ايدن عبادتله اولور.
ايكنجيسى: عبادت، فكرلرى صانعِ حكيمه چويرتديرمك ايچوندر. عبدڭ صانعِ حكيمه اولان توجّهى، إطاعت و إنقيادينى إنتاج ايدر. إطاعت و إنقياد ايسه، عبدى إنتظامِ أكمل آلتنه إدخال ايدر. عبدڭ إنتظام آلتنه گيرمهسيله و نظامه إتّباع ايتمهسيله، حكمتڭ سرّى تحقّق ايدر. حكمت ايسه، كائنات صحيفهلرنده پارلايان صنعت نقشلريله تبارز ايدر.
اوچنجيسى: إنسان سانترال گبى، بتون خلقتڭ نظاملرينه و فطرتڭ قانونلرينه و كائناتدهكى نواميسِ إلٰهيهنڭ شعاعلرينه بر مركزدر. بناءً عليه إنسانڭ او قانونلره إنتساب و إرتباط ايتمهسى و او ناموسلرڭ أتكلرينه ياپيشوب تمسّك ايتمهسى لازمدر كه، عمومى جريانى تأمين ايتسين. و طبقاتِ عالمده دوران ايدن دولابلرڭ حركتلرينه مخالفتله او دولابلرڭ چرخلرى آلتنده أزيلمهسين. بو ده آنجق، اوامر و نواهيدن عبارت اولان عبادتله اولور.