أحوالى، منافقلرڭ أحوالنى تماميله تمثيل ايتدكلرى و هر بر حاللرى يولجيلرڭ حاللرنده گورونديگى گبى، هر بر ذرّهده و هر بر حالده قدرتِ إلٰهيهنڭ ده تصرّفى گورونور.
تحقيقى إفاده ايدن (اِنَّ) داخل اولديغى حكمڭ ثابت و صارصيلماز حقيقتلردن اولديغنه دلالت ايتديگى گبى، مسئلهنڭ عظمتنه، وسعتنه، دقّتنه و نوعِ بشرڭ ده بو گبى مسئلهلرده عاجز، ضعيف، قاصر اولديغنى رمزًا گوسترييور. چونكه بو گبى يقينى مسئلهلرده تردّدى إنتاج ايدن وهملردر. وهملرى توليد ايدن ضعفيت، عجز، قصوردر. بونلر ده إنسانڭ طينتيله يوغرولمش صفتلردر.
(اَللّٰهُ) لفظۀِ جلالڭ بوراده صراحةً ذكر ايديلمهسى، بو جملهدهكى حكمى إثبات ايدن دليله إشارتدر. چونكه بتون موجودات تحتِ تصرّفنده و دائرۀِ شمولنده بولونان قدرت، سائر صفتلر گبى الوهيتڭ لازمهسيدر.
(عَلٰى) كلمهسندن آڭلاشيلير كه، عدمدن أشيايى چيقارتان قدرت، او أشيايى مهمل و باشى بوش بيراقماز. آنجق حكمتڭ مراقبه و نظارتى آلتنده تربيه ايتديرر.
(كُلِّ) أداتندن آڭلاشيلير كه، أسبابڭ بتون أثرلرى و حاصلِ بِالمصدر دينيلن أفعالِ إختياريهيه ترتّب ايدن أثرلر تمامًا قدرته باغليدر. موجود و موجوداته شئ و أشيا دينيلمسى، مشيئتِ إلٰهيهنڭ تعلّقندن نشئت ايتديگنه نظرًا؛ (شَىْءٍ) تعبيرندن آڭلاشيلير كه، أشيا وجوده گلدكدن صوڭره ده، صانعدن علاقهلرى كسيلمهيور. وجودڭ تكرّرندن عبارت اولان بقالرى ايچون دائما صانعه محتاجدرلر.