نفسلرينڭ شيطانى اولان هواسى قرآنڭ صداسنى قولاقلرينه ايريشديرهجك هوايى قاريشديرمقله مانع اولمشدر. قرآنِ كريم بو جهتدن اميدلرى إنقطاع ايتمش اولديغنه إشارةً (صُمٌّ) ديمشدر. و بو إشارتدن، صانكه قولاقلرى كسيلمش، قولاقلرى كسيك ايتلرڭ قولاقلرينى آڭديران پك چركين دليكلر قالديغنه بر رمز واردر.
ثانيًا: باشلرينى آشاغىيه اينديروب، وجدانلريله مشاوره ايتمكله، طوغرى يولى، حقّى سؤال ايتمكدن نجات جوابنى آلمق إمكانى وار ايكن، قلبلرندهكى عناد، ذبح ايديلن طاووق گبى، ديللرينى ايچرى طرفه چكهرك، قونوشمهلرينه و ندامت ايله توبه ايتمهلرينه مانع اولمشدر. قرآنِ كريم بو قپونڭ قپالى اولديغنه إشارةً (بُكْمٌ) ديمشدر. و بو إشارتدن، ديللرى چكيلوب آتيلمش و آغزلرى سينك يوواسى گبى قوقولى چركين بر دليك گبى صورتلرنده قالمش اولديغنه بر رمز واردر.
ثالثًا: عبرت نظريله داخلى و خارجى دليللرى گورمكله، حقّه رجوعلرى ممكن ايكن، غفلتلرى گوزلرينه أل باصارق كورلك ده قپاقلرى قپاتمقله ينه نجاتدن محروم قالمشلردر. قرآنِ كريم بوڭا إشارةً (عُمْىٌ) ديمشدر. يعنى، شيطانلره بر يووا إنشا ايديلمك اوزره گوزلرى اويولمش شيطانلرڭ باشلرينى آڭديران، باشلرنده چركين و قورقونج ايكى دانه مغاره شكلنى خياله عرض ايدييورلر.
رابعًا: پيس و چركين وضعيتلرينه باقوب ده نادم اولارق توبه ايتمهلرى ممكن اولديغى حالده نفسلرينڭ هواسنه، بوزوق فطرتلرينڭ إقتضاسنه إنضمام ايدن شيطانڭ إغواسيله ياپدقلرى او چركين حاللر گوزلرينه گوزل گورونديگندن، ترك ايدهمديلر. ايشته قرآنِ كريم بوڭا ده (فَهُمْ لَا يَرْجِعُونَ) ديمكله، اونلرڭ صوڭ اميدلرينڭ ده صويه دوشديگنه و قوم درياسنه إختياريله گيروب بر داها إختياريله چيقاميان بدبخت إنسانلر اولديغنه إشارت ايتمشدر.