س - تمثيلده «نور»دن بحث ايديلمشدر. منافقلرڭ نورى نرهده؟
ج - كنديسنده نور اولميان بر إنسان، محيطنده بولونان نوردن إستفاده ايدر. محيطنده بولونماسه قَومنده، قَومنده بولونماسه نوعنده، نوعنده بولونماسه فطرتنده، فطرتنده ممكن اولماسه دنيا منفعتلرى ايچون لساننده واردر. بو ده اولماسه أوّلجه ايمان ايدوب، صوڭره إرتداد ايدنلرڭ أوّلكى نورلرينه إشارتدر. بو ده اولماسه، دنيايه عائد گوردكلرى إستفادهلرينه إشارتدر. (ناصلكه آتش فتنهلرينه إشارتدر.) بو ده اولماديغى تقديرده، دائرۀِ إمكانده اولان نورلرى وجود دائرهسنه اينديريلمشدر. (اِشْتَرَوُا الضَّلَالَةَ بِالْهُدٰى) دهكى هدايت گبى.
صوڭره جملهلرينڭ آراسندهكى جهتِ إنتظام:
(مَثَلُهُمْ كَمَثَلِ الَّذِى اسْتَوْقَدَ نَارًا) يعنى، اونلرڭ مسئلهسى آتش ياقان آدمڭ مسئلهسى گبيدر. بو جملهنڭ موقع و مقامه اولان مناسبتى، شويله تصوير ايديلهبيلير كه: آيتده بيان ايديلديگى شكل اوزرينه، آتش ياقان آدمڭ حالى جزيرة العربده ساكن قرآنڭ مخاطبلرندن برنجى طبقهدهكى آدملرڭ حاللرينه تطابق ايدييور. زيرا او طبقهدهكى آدملر، بو آتشى ياقان آدمڭ حالنى يا بِالذّات گورمشلر ويا ايشيتمشلردر. و او حالڭ نه درجه مؤثّر و فجيع اولديغنى حسّ ايتمشلردر. زيرا اونلر ده چوق دفعه گونشڭ ظلمندن، گيجهنڭ ظلمتنه قاچارق، گيجه سريننده يوللرينه دوام ايتدكلرى صيراده شدّتلى ياغمورلره راست گلهرك چوق زحمتلره دوشمشلردر. و كذا چوق دفعه يوللرينى غيب ايدهرك مضر حيوانلر ايله طولو مغارهلره گيرمشلردر. و آرقداشلرينى گوروب، اونلر ايله فرحلانمق و أشيالرينى گوروب محافظه ايتمك ويا مضر حيوانلرى گوروب اونلردن تحفّظ ايتمك ايچون آتش ياقمشلردر. آتشڭ ضياسندن إستفاده ايدرلر ايكن سماوى بر آفت ايله