عشقڭ بولونمديغندن، سوزلرينى شدّتسز و تأكيدسز سرسريانه سويلهمش اولدقلرينه إشارتدر.
و كذا اونلرڭ تأكيدلرى، عدم حكمنده اولوب، مؤمنلره اينانديرهمدقلرينه إشارتدر. و كذا (اٰمَنَّا) كلمهسيله؛ نفاقلرينه ئورتدكلرى پرده پك ضعيف اولديغندن، تأكيد و تشديد ايديلديگى تقديرده ييرتيلماسى إحتمالى اولديغنه إشارتدر. چونكه تأكيد، تشديد، شبههيه داعيدر. شبهه ايسه، تحقيقاته باعثدر. تحقيقات ياپيلديغى تقديرده، بويالرى ميدانه چيقار. (اٰمَنَّا) نڭ جملۀِ فعليه ايله ذكرى ايسه ايمانلرينڭ ثابت و دواملى اولديغنى، مؤمنلره اينانديرمق إمكاننى بولامدقلرينه؛ يالڭز منفعتلرى جلب، أسراره مطّلع اولمق مقصديله مؤمنلره مداهنه و تصنّع ياپمقله إحداثِ ايمان ايتدكلرينه إشارتدر.
(وَاِذَا خَلَوْا اِلٰى شَيَاطٖينِهِمْ قَالُٓوا اِنَّا مَعَكُمْ) أوّلكى آيتله بو آيتڭ بربرينه اولان عطفلرى، اونلرڭ مسلكسز، ثباتسز اولدقلرينه إشارتدر.
(اِذَا) نڭ إفاده ايتديگى جزميت، إعتياد ايتدكلرى فساد و إفساد إقتضاسيله، شيطانلرينه گيتمهلرينى ضرورى بر وظيفه بيلدكلرينه إشارتدر.
(خَلَوْا) تعبيرى، جنايتلرندن قورقدقلرندن تستّر و گيزلنمك ايستدكلرينه إشارتدر.
(اِلٰى) كلمهسنڭ (خَلَوْا) كلمهسيله داها اويغون اولان (مَعَ) كلمهسنه ترجيحًا ذكر ايديلمهسى، ايكى شى ايچوندر. بريسى: عجز و ضعفلرى