كوتولگى نهدر كه، اونلره قارشى بويله فنالقده بولونورسڭز؟ شفقتِ جنسيهڭز يوق ميدر؟ نه ايچون مرحمت ايتمييورسڭز؟ پك أعلا، تسليم ايتدك كه، شفقتِ جنسيهڭز يوقدر. هيچ اولماسه نفرتِ عموميهدن قورقوڭز.» دييه اونلرى ايقاظ ايدييور.
س - اونلرڭ مقصدلرى عموم إنسانلر دگلدر. نه ايچون اونلرڭ فسادى بتون إنسانلره سرايت ايتسين؟
ج - أوت، سياه بر گوزلگى طاقان آدم هر شيئى سياه و چركين گورور. كذالك بصيرت گوزى ده نفاق ايله پردهلنيرسه و قلب كفر ايله پيچهلنيرسه بتون أشيا چركين و كوتو گورونور. و بتون إنسانلره بلكه كائناته قارشى بر بغض، بر عداوته سبب اولور. هم ده كوچك بر ديشڭ قيريلمهسيله بيوك بر ماكينهنڭ متأثّر اولديغى گبى، بر شخصڭ نفاقيله هيئتِ بشريهنڭ إنتظامى متأثّر اولور. زيرا عدالت، إنتظام، إسلاميت إطاعتله اولور. مع الأسف اونلرڭ سرپدكلرى زهرلر طبقهدن طبقهيه إنتقال ايده ايده، بو ذلّت، سفالتى إثمار ايتمشدر.
(قَالُوا اِنَّمَا نَحْنُ مُصْلِحُونَ) يعنى، «خلقى إفساد ايتمهيڭ.» دينيلديگى زمان «بزلر آنجق إصلاح ايديجى إنسانلرز.» إدّعاسنده بولونديلر.
(اِنَّمَا) ده ايكى خاصيت واردر.
برنجيسى: داخل اولديغى حكمڭ حقيقةً ويا إدّعاءً معلوم اولماسى لازمدر. بو خاصيتدن نصيحت ايدنلرى تزييف ايتمگه و جهالتلرينه اولان ثباتلرينى إظهار ايتمگه بر رمز واردر. يعنى: «بزم إصلاح ايديجى اولديغمز معلومدر، بناءً عليه مسلگمزده ثبات ايدرز، نصيحتلره قولاق آصان دگلز.»