آخرت سعادتنڭ رهبرى بولونماسى و بتون عصرلردهكى طبقاتِ بشره خطاب ايتمهسى و كائنات خالقنڭ مرضياتنى قوللرينه بيلديرهجك آيات و بيّناتى تفسير و ايضاح ايدهجك متخصّص أهلِ علمڭ بولونماسى ضرورتنه بناءً هر عصرده گلن بيڭلر مدقّق أهلِ علم، يوز بيڭلرله قرآن تفسيرلرينى ميدانه گتيرمشلر؛ بتون عصرلرى قرآنڭ نوريله ايشيقلانديرمشلردر.
ايشته رسالۀِ نور ده؛ بو عصرده قرآنڭ فيضيله وجود بولان، بشرڭ تكمّلاتنه اويغون اولارق قرآنڭ گوسترديگى معجزهلى حقيقتلرڭ، بو تكامل ايله ساحۀِ فعله قونولديغنى بيلديرن و عصرڭ إدراكنه خطاب ايدن غايت قدسى بر تفسيردر. قرآن باشدن باشه توحيدِ إلٰهىيى إعلان ايدييور. رسالۀِ نور ده، ايمانِ بِاللّٰهى گوسترن و حقائقِ ايمانيهيى درس ويرن آيتلرى تفسير ايدييور.
ايشته محاكمهنڭ أصل موضوعى بودر.
اوتوز سنهدن بَرى گيزلى دين دشمنلرينڭ، قومونيستلرڭ و ماصونلرڭ تحريكاتيله، رسالۀِ نور شاكردلرى بر چوق محكمهلره سَوق ايديلمشلر. عادل محكمهلر ده او خائن، گيزلى دين و قرآن دشمنلرينڭ ايتدكلرى إفترالرى اينجهدن اينجهيه تدقيق ايتمشلر، «بونلرده بر صوچ يوق، كتابلر ايسه فائدهلى كتابلردر» دييهرك، چوق محكمهلر برائتله نتيجهلنمشلردر.
تمييز محكمهسى ده، اوچ دفعه محكمهلرڭ برائت قرارينى تصديق ايتمش. حكم قضيۀِ محكمه حالنه گلديگى حالده، مملكتى عمومى بر دينسزلگه سوروكلهمك ايچون پرده آرقهسندهكى دين دشمنلرى؛ فعاليتلرينى متماديًا تازهلهمشلر، سكون و آسايشه پك چوق محتاج اولان مملكتمزى بو جهتدن ضعفه اوغراتمق ايچون عدليهلرى، محكمهلرى دائما خائنانه ترتيبلرله مشغول ايتمشلردر.