مراجعت ايديلهجك تفسيرلرڭ، كتابلرڭ بولونماسى ممكن اولماديغندن؛ يازدقلرم يالڭز سنوحاتِ قلبيهمدن عبارت قالدى. شو سنوحاتم أگر تفسيرلره موافق ايسه، نوُرٌ عَلٰى نوُر؛ شايد مخالف جهتلرى وارسه، بنم قصورلريمه عطف ايديلهبيلير. أوت تصحيحه محتاج يرلرى واردر، فقط خطِّ حربده بيوك بر إخلاص ايله، شهيدلر آراسنده يازيلوب گيديريلن او ييرتيق عبارهلرڭ تبديلنه (شهيدلرڭ قان و ألبسهلرينڭ تبديلنه جواز ويرلمديگى گبى) جواز ويرهمدم و قلبم راضى اولمادى. شيمدى ده راضى دگلدر، چونكه او زماندهكى إخلاص و خلوصى شيمدى بولامييورم (حاشيه).
مع هذا قلمه آلديغم شو إشارات الإعجاز آدلى أثريمى، حقيقى بر تفسير نيّتيله ياپمدم؛ آنجق علماىِ إسلامدن أهلِ تحقيقڭ تقديرلرينه مظهر اولديغى تقديرده، اوزاق بر إستقبالده ياپيلاجق يوكسك بر تفسيره بر ئورنك و بر مأخذ اولمق اوزره او زمانلرڭ إنسانلرينه بر يادگار مقصديله ياپدم.
سعيد النورسى
* * *
___
(حاشيه): يڭى سعيد، رسالۀِ نوردهكى حقيقى إخلاص ايله ينه او إخلاصى بولدى. يڭى سعيد، عين إخلاص ايله باقدى، تصحيح يرينى بولامادى. ديمك سنوحاتِ قرآنيه اولديغندن، إعجازِ قرآنيه اونى ياڭليشلردن حمايه ايتمش.
نور طلبهلرى