إفاده ايدر. زنگين اولان ايسترسه، زياده معناسنى؛ فقير اولان ايسترسه، إعطا معناسنى؛ ضعيف اولان ايسترسه اعانه و توفيق معناسنى إفاده ايدر. و كذا «هر شيئى خلق و هدايت ايتمشدر» معناسنده بولونان (خَلَقَ كُلَّ شَىْءٍ وَهَدٰى) حكمنجه، ظاهرى و باطنى طويغولر، آفاقى و خارجى دليللر، أنفسى و داخلى برهانلر، پيغمبرلرڭ إرساليله، كتابلرڭ إنزالى گبى واسطهلر إعتباريله ده هدايتڭ معناسى تعدّد ايدر.
إخطار: أڭ بيوك هدايت، حجابڭ قالديريلماسيله حقّى حق، باطلى باطل گوسترمكدر.
(اَللّٰهُمَّ اَرِنَا الْحَقَّ حَقًّا وَارْزُقْنَا اِتِّبَاعَهُ ، وَاَرِنَا الْبَاطِلَ بَاطِلًا وَارْزُقْنَا اِجْتِنَابَهُ اٰمٖينَ)
(اَلصِّرَاطَ الْمُسْتَقٖيمَ) : صراطِ مستقيم؛ شجاعت، عفّت، حكمتڭ مزجندن و خلاصهسندن حاصل اولان عدل و عدالته إشارتدر. شويله كه:
تغيّر، إنقلاب و فلاكتلره معروض و محتاج شو إنسان بدننده إسكان ايديلن روحڭ ياشايابيلمسى ايچون اوچ قوّت إحداث ايديلمشدر. بو قوّتلرڭ برنجيسى: منفعتلرى جلب و جذب ايچون قوّۀِ شهويۀِ بهيميه. ايكنجيسى: ضررلى شيلرى دفع ايچون قوّۀِ سَبُعِيۀِ غضبيه. اوچنجيسى: نفع و ضررى، ايى و كوتويى بربرندن تمييز ايچون قوّۀِ عقليۀِ مَلكيهدر.
لٰكن إنساندهكى بو قوّتلره شريعتجه بر حدّ و بر نهايت تعيين ايديلمش ايسه ده، فطرةً تعيين ايديلمهمش اولديغندن بو قوّتلرڭ هر بريسى تفريط، وَسَط، إفراط ناميله اوچ مرتبهيه آيريليرلر. مثلا: قوّۀِ شهويهنڭ تفريط مرتبهسى خموددر كه؛ نه