زمانلر گچدكجه، قرآنڭ علوى سرلرى إنكشاف ايدييور
دوقتور موريس، (لو پارله فرانسس رومان) عنوانلى غزتهده قرآنڭ فرانسزجه مترجملرندن سولومون ريناخڭ تنقيداتنه ويرديگى جوابده دييور كه:
قرآن نهدر؟ هر تنقيدڭ فوقنده بر فصاحت و بلاغت معجزهسيدر. قرآنڭ، اوچ يوز أللى ميليون مسلمانڭ گوگسنى حقلى بر غرورله قبارتان مزيتى، اونڭ هر معنايى حسنِ إفاده ايتمهسى إعتباريله، منزَل كتابلرڭ أڭ مكمّلى و أزلى اولماسيدر. خاير، داها ايلرى گيدهبيليرز: قرآن، قدرتِ أزليهنڭ، عنايت ايله إنسانه بخش ايتديگى كتبِ سماويهنڭ أڭ گوزليدر. بشريتڭ رفاهى نقطۀِ نظرندن قرآنڭ بياناتى، يونان فلسفهسنڭ إفاداتندن پك زياده علويدر. قرآن، أرض و سمانڭ خالقنه حمد و شكرانله طولودر. قرآنڭ هر كلمهسى، هر شيئى يارادان و هر شيئى حائز اولديغى قابليته گوره سَوق و إرشاد ايدن ذاتِ كبريانڭ عظمتنده مندمجدر. أدبيات ايله علاقهدار اولانلر ايچون قرآن، بر كتابِ أدبدر. لسان متخصّصلرى ايچون قرآن، بر ألفاظ خزينهسيدر. شاعرلر ايچون قرآن، بر آهنك منبعيدر. بوندن باشقه بو كتاب؛ أحكام و فقه نامنه بر محيطِ معارفدر. داودڭ (عس) زمانندن، ژان طالموسڭ دورينه قدر گوندريلن كتابلرڭ هيچ برى، قرآنِ كريمڭ آيتلريله موفّقيتلى بر شكلده رقابت ايدهمهمشدر. بوندن طولاييدر كه، مسلمانلرڭ يوكسك صنفلرى، حياتڭ حقيقتنى قاورامق نقطۀِ نظرندن نه قدر تنوّر ايدرلرسه، او درجه قرآن ايله علاقهدار اولويورلر و اوڭا او قدر تعظيم و حرمت گوسترييورلر.
مسلمانلرڭ قرآنه حرمتلرى دائما تزايد ايتمكدهدر. إسلام محرّرلرى، قرآن آيتلرينى إقتباس ايله يازيلرينى سوسلرلر و او يازيلر او آيتلردن ملهم اولورلر. مسلمانلر، تحصيل و تربيه إعتباريله يوكسلدكجه، فكرلرينى او نسبتده قرآنه إستناد ايتديرييورلر. مسلمانلر، كتابلرينه عاشقدرلر و اونى قلبلرينڭ بتون صميميتيله