ديوانهلكدر. أوت آيينه محافظه ايديلمهلى، چونكه مظهردر. ايشته مرشدڭ روحى و قلبى بر آيينهدر. جنابِ حقدن گلن فيضه معكس اولور، مريدينه عكس ايديلمهسنه ده وسيله اولور. وسيلهلكدن فضله فيض نقطهسنده مقام ويريلمهمك لازمدر. حتّى بعضًا اولور كه، مصدر تلقّى ايديلن بر استاد، نه مظهردر، نه مصدردر. بلكه مريدينڭ صفوتِ إخلاصيله و قوّتِ إرطباتيله و اوڭا حصرِ نظرله او مريد باشقه يولده آلديغى فيوضاتى، استادينڭ مرآتِ روحندن گلمش گورويور. ناصلكه بعض آدم، مانيهتيزمه واسطهسيله بر جامه دقّت ايده ايده عالمِ مثاله قارشى خيالنده بر پنجره آچيلير. او آيينهده چوق غرائبى مشاهده ايدر. حالبوكه آيينهده دگل، بلكه آيينهيه اولان دقّتِ نظر واسطهسيله آيينهنڭ خارجنده خيالنه بر پنجره آچيلمش گورويور. اونڭ ايچوندر كه، بعضًا ناقص بر شيخڭ خالص بر مريدى، شيخندن داها زياده كامل اولابيلير و دونر شيخنى إرشاد ايدر و شيخنڭ شيخى اولور.