مغرب زمانى ايسه، گوز موسمنڭ آخرنده پك چوق مخلوقاتڭ غروبنى، هم إنسانڭ وفاتنى، هم دنيانڭ قيامت إبتداسنده‌كى خرابيتنى إخطار ايله، تجلّياتِ جلاليه يى إفهام و بشرى غفلت اويقوسندن اويانديرر، ايقاظ ايدر.

عشاء وقتى ايسه، عالمِ ظلمات، نهار عالمنڭ بتون آثارينى سياه كفنى ايله ستر ايتمسنى، هم قيشڭ بياض كفنى ايله ئولمش يرڭ يوزينى اورتمسنى، هم وفات ايتمش إنسانڭ بقيّۀِ آثارى دخى وفات ايدوب نسيان پرده‌سى آلتنه گيرمسنى، هم بو دارِ إمتحان اولان دنيانڭ بتون بتون قپانمسنى إخطار ايله قهّارِ ذو الجلالڭ جلاللى تصرّفاتنى إعلان ايدر.

گيجه وقتى ايسه، هم قيشى، هم قبرى، هم عالمِ برزخى إفهام ايله، روحِ بشر رحمتِ رحمانه نه درجه محتاج اولديغنى إنسانه خاطرلاتير. و گيجه‌ده تهجّد