أحباب و شفقتلى دوست بولدڭ. هم چوق مشقّتلى خدمتلردن پايدوس أمرينى ينه خسته‌لقدن آلدڭ، إستراحت ايدييورسڭ. ألبته سنڭ جزئى ألمڭ، بو معنوى لذّتلره قارشى سنى شكوايه دگل، تشكّره سَوق ايتمليدر.

يگرمى ايكنجى دواء: أى نزول گبى آغير خسته‌لقلره مبتلا اولان قارداش! أوّلا سڭا مژده ايدييورم كه؛ مؤمن ايچون نزول مبارك صاييلييور. بونى چوقدن أهلِ ولايتدن ايشيدييوردم. سرّينى بيلمزدم. بر سرّى شويله قلبمه گلييور كه:

أهل اللّٰه، جنابِ حقّه واصل اولمق و دنيانڭ عظيم معنوى تهلكه‌لرندن قورتولمق و سعادتِ أبديه‌يى تأمين ايتمك ايچون، ايكى أساسى إختيارًا تعقيب ايتمشلر:

بريسى: رابطۀِ موتدر. يعنى: دنيا فانى اولديغى گبى، كنديسى ده ايچنده وظيفه‌دار فانى بر مسافر اولديغنى دوشونمكله، حياتِ أبديه‌سنه او صورتله چاليشمشلر.