خسته او وصايا و او تسلّى‌يه إعتماد ايدوب خسته‌لغى خفيفلشير، صيقنتى يرنده بر فرحلق ويرر.

امّا وهمى خسته‌لق قسمى ايسه؛ اونڭ أڭ مؤثّر علاجى، أهمّيت ويرمه‌مكدر. أهمّيت ويردكجه او بيور، شيشر. أهمّيت ويرمزسه كوچولور، طاغيلير. ناصلكه آريلره ايليشدكجه، إنسانڭ باشنه اوشوشورلر، آلديرمازسه‌ڭ طاغيليرلر. هم قراڭلقده گوزينه صاللانان بر ايپدن گلن بر خياله أهمّيت ويردكجه بيور. حتّى بعضًا اونى ديوانه گبى قاچيرر؛ أهمّيت ويرمزسه، عادى بر ايپڭ ييلان اولماديغنى گورور، باشنده‌كى تلاشنه گولر.

بو وهمى خسته‌لق چوق دوام ايتسه، حقيقته إنقلاب ايدر. وهّام، عصبى إنسانلرده فنا بر خسته‌لقدر. حبّه‌يى قبّه ياپار؛ قوّۀِ معنويه‌سى قيريلير. خصوصًا مرحمتسز ياريم حكيملره وياخود إنصافسز دوقتورلره راست گلسه، أوهامنى داها زياده تحريك ايدر. زنگين ايسه مالى گيدر؛ يوقسه يا عقلى گيدر ويا صحّتى گيدر.