أى آرقداش! ديمك، بو موقّت مملكت بر تارلا حكمندهدر. بر تعليمگاهدر، بر پازاردر. ألبته آرقهسنده بر محكمۀِ كبرا، بر سعادتِ عظما گلهجكدر. أگر بونى إنكار ايتسهڭ؛ بتون ضابطلردهكى جزدانلرى، دفترلرى تجهيزاتلرى، دستورلرى بلكه شو مملكتدهكى بتون إنتظاماتى، حتّى حكومتى إنكار ايتمگه مجبور اولورسڭ و بتون واقع اولان إجراآتڭ وجودينى تكذيب ايتمك لازم گلير. او وقت سڭا، إنسان و ذىشعور دينلمز. سوفسطائيلردن داها عقلسز اولورسڭ.
صاقين ظن ايتمه؛ تبديلِ مملكت دليللرى بو «اون ايكى صورته» منحصردر. بلكه حدّ و حسابه گلمز أمارهلر، دليللر وار كه: شو قرارسز متغيّر مملكت؛ زوالسز، مستقر بر مملكته تحويل ايديلهجكدر. هم حدّ و حسابه گلمز إشارتلر، علامتلر وار كه: بو أهالى، شو موقّت مسافرخانهلردن آلينهجق، سلطنتڭ مقرِّ دائميسنه گوندريلهجك.