شى گلمز. أوت هر كيم فكرًا تاريخه بينوب ماضى جهتنه گيتسه، شو زمانِ حاضرده گورديگمز منزلِ دنيا، ميدانِ إبتلا، مشهرِ أشيا گبى، سنه‌لر عددنجه وفات ايتمش منزللر، ميدانلر، مشهرلر، عالملر گوره‌جك. صورتجه، كيفيتجه بربرندن آيرى اولدقلرى حالده؛ إنتظامجه، عجائبجه، صانعڭ قدرت و حكمتنى گوسترمكجه بربرينه بڭزر. هم گوره‌جك كه؛ او ثباتسز منزللرده، او دوامسز ميدانلرده، او بقاسز مشهرلرده او قدر باهر بر حكمتڭ إنتظاماتى، او درجه ظاهر بر عنايتڭ إشاراتى، او مرتبه قاهر بر عدالتڭ أماراتى، او درجه واسع بر مرحمتڭ ثمراتنى گوره‌جك. بصيرتسز اولمامق شرطيله يقينًا بيله‌جك كه: او حكمتدن داها أكمل بر حكمت اولاماز و او آثارى گورونن عنايتدن داها أجمل بر عنايت قابل دگل و او أماراتى گورونن عدالتدن داها أجلّ بر عدالت يوقدر و او ثمراتى گورونن مرحمتدن داها أشمل بر مرحمت تصوّر ايديلمز.