﴿بِاسْمِهٖ سُبْحَانَهُ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ﴾
چوق معزّز، چوق مبارك و چوق شفقتلى استاديمز أفنديمز!
أسكيدن نه آجى گونلر، نه قره گونلر گچيردك. چوجقلريمزڭ قرآن درسنه گيتمه‌لرى بيله ياساق ايديلمشدى. مكتبلرده ده دين درسلرى قالديريلمشدى. رسالۀِ نور يازانلرى محكمه‌لره ويرييورلردى. سز چوق مبارك استاديمزه، دين دشمنلرى چوق أذيتلر ياپديلر. چوق جفالر چكديرديلر. رسالۀِ نور يازدى، دينه يڭيدن بيوك بر قوّت ويردى، مسلمانلغى ايلرلتدى، دييه سزى ئولومه محكوم ايتمگه چاليشديلر. بز او آجيقلى گونلرده آغلادق، صيزلادق. «يا ربّى! استاديمزى محافظه أيله! دينمزه، استاديمزه، رسالۀِ نوره دشمنلق ايدنلرى قهر أيله!» دييه اللّٰهه يالوارييوردق. عادتا قانلى گوزياشلرى دوكويوردق.
صوڭنده جنابِ حق سز استاديمزى محافظه ايتدى، دينسزلر ييقيلديلر. مسلمانلغى يوق ايتمگه قصد ايدنلر مضمحل اولديلر. سز استاديمز ايسه دينى خدمتڭزده مظفّر اولديڭز. ملّتمزى دينسزلرڭ ضررندن قورتارديڭز، ظفرلر قزانديڭز. مسلمانلرڭ مسعود گونلر گچيرمسنه سبب اولديڭز. بو سايه‌ده دينى إستقلاليتمزه، دينى حرّيتمزه قاووشدق. رسالۀِ نور مطبعه‌لرده چوق چوق باصيلمايه باشلادى، بز قادينلر چوق مسرور اولدق. نورلريمزى باصيلمش گورونجه يڭيدن دنيايه گلمشجه‌سنه سَوينجلر ايچريسنده قالدق. بزه بيڭلرجه بشى برلكلر، آلتونلر، ألماسلر ويرسه‌لردى؛ ايپكدن، آطلاسدن ألبسه‌لر طاغيتسه‌لردى، بزى بو درجه ممنون ايده‌مزلردى. رسالۀِ نورى باصديرمق؛ دينه، ايمانه أڭ برنجى، أڭ بيوك خدمتدر.
استاديمز أفنديمز!
دين، ايمان عشقيله، مسلمانلق طويغوسيله مسعود اولابيله‌جك بز آننه‌لر؛ ياورولريمزه قرآنِ كريمى اوگرتييورز، رسالۀِ نوره چاليشديرييورز. رسالۀِ نورڭ ايمان، إسلاميت درسلريله تربيه ايتمگه چاليشييورز. أولريمز برر مدرسۀِ نوريه اولويور، الحمد لِلّٰه. أگر چوجقلريمزه رسالۀِ نور اوقوتمازسه‌ق يولدن چيقاريجى بو زمانڭ تهلكه‌لرينه دوشه‌جكلر، فنا گوره‌نكلره قاپيلاجقلر، كوتولكلرى تقليد ايده‌جكلر. بزم باشمزه بلا و درد كسيله‌جكلر. آخرتده ده «ايمانمزى نه‌دن قورتارمديڭز؟» دييه آننه و بابالرندن دعواجى اولاجقلردر. بونڭ ايچون سَوْگيلى ياورولريمزڭ قلبلرينه رسالۀِ نور سَوْگيسنى آشيلييورز.
قادينلرڭ چوجقلرينه قارشى شفقتلرى فضله‌در. أگر چوجقلرينڭ أبدى آخرت حياتلرينى قورتاره‌جق ايمان درسلرى ويريلمزسه، بو إهمال ايديلير ده يالڭز موقّت، فانى دنيا حياتنه چاليشديريليرسه او وقت چوجقلره اولان شفقت، حقيقى يرينه صرف ايديلمش اولماز. چوجغڭ هم دنياده هم آخرتده ده فلاكتنه سبب اولان بر شفقت اولمش اولور.
چوجقلريمزه اوقشايه‌رق سَوْگيله دييورز كه:
«أولادم! رسالۀِ نور، سنى هم دنياده هم آخرتده مسعود، بختيار ايده‌جك أڭ بيوك و أڭ حقيقى بر دين كتابيدر، ايمان درسلريدر. اوقومقدن محروم قاليرسه‌ڭ، ايمان درسلرينى شيمدى آلامازسه‌ڭ هم دنياده هم آخرتده بدبخت اولورسڭ، پريشان قاليرسڭ.» دييه‌رك و رسالۀِ نور حقّنده يازيلمش اولان مكتوبلرى، دستانلرى، قصيده‌لرى، شعرلرى اوقويه‌رق، اوقوته‌رق رسالۀِ نورڭ سَوْگيسنى قلبلرينه، بيوكلگنى روحلرينه يرلشديرمكده دوام ايده‌جگز. دعالريڭز سايه‌سنده رسالۀِ نورڭ درسلريله إن شاء اللّٰه أولادلريمز إسلاميته هم بزه هم ملّتمزه خيرلى، ديندار گنجلر اولارق يتيشيرلر.
مبارك استاديمز!
سَوْگيلى ربّمزڭ قلبلريمزده رحمتيله درج ايتديگى محبّت حسّنى؛ نه‌دن بزى أبدى سعادته گوتوره‌جك اولان ايمان درسلرى، رسالۀِ نور و سز استاديمز يولنده صرف ايتميه‌لم؟ باشقه يولده صرف ايتسه‌ك بزه دنيا و آخرتده أيواهلر ديديرته‌جك، خسرانه گوتوره‌جك، بلكه ده أبديًا آغلاته‌جق. أگر چوجقلريمزه ده بو أهمّيتلى حقيقتى آشيلامقله حقيقى شفقتمزى سوءِ إستعمال ايتمه‌دن گوستره‌بيلسه‌ك آنالق وظيفه‌مزى بِحقّ ايفا ايتمش اولاجغز.
رسالۀِ نور حقّنده، ايچنده چوق گوزل قونفرانس و نورلى مكتوبلر و پك گوزل قصيده‌لر بولونان كتابى بورسه‌دن گتيرتدك. اوقودقجه، ديڭله‌دكجه چوق مسرور اولويورز، روحلريمز شاد اولويور. اونلرى يازان نور طلبه‌سى قارداشلريمزدن جنابِ حق راضى اولسون، آمين!
اَلْبَاقٖى هُوَ الْبَاقٖى
دعاڭزه محتاج
إستانبول خانملرى
* * *
ايمانه فداكارانه خدمت ايدن بر خانمڭ منظومه‌سيدر.
رسالۀِ نور مؤلّفى استادم حضرتلرينه!
معنوى نور قلنجنى آلمش ألنه
وورويور منافقلرڭ باش و بلنه
هر سويله‌ديگى حكمت اولان استاديمڭ
مولام علم ويرمش او نور ديلنه
بو ناصل آتشدر بويله ياقييور
قاورولوب دومانى گوگه چيقييور
ايمان، قرآن درسى ويرن استاديمڭ
قلمندن عالمه نورلر آقييور
ايمان يولنده جاننى فدا أيله‌مش
بو شاهده شيمدى‌يه دك نيله‌مش
صحيح اولان حديث و إشارتلرله
رسول اونڭ گله‌جگنى سويله‌مش
طلبه‌لرينه استاد طورمايڭ دييور
منافق سوزينه اويمايڭ دييور
فانى ايله فنا ايله ايلگيسى يوقدر
بڭا فانى شيلر صورمه‌يڭ دييور
شاهده طورمه بويله
حقّى هر يرده سويله
رسالۀِ نورلرله
ايمانه خدمت أيله
نور دفينه‌سى قازدير
نورلرى اوقوت يازدير
وقتنى بوش گچيرمه
چونكه عمر پك آزدر
اوقوديغڭ نور اولسون
قلبنه نورلر طولسون
نورلرى اوقومقله
ايمانمز قورتولسون
گوزلرى نور صاچييور
قلبلرده گُل آچييور
نورڭ حقيقتندن
منافقلر قاچييور
قارداشلر هپ آغلايور
استاده بل باغلايور
نورلرده‌كى حقيقت
دريا گبى چاغلايور
قلبلريمز هپ اويور
استادم دعا بيور
عمريمز توكنمه‌دن
بزه ايمانى طويور
اَلْبَاقٖى هُوَ الْبَاقٖى
نورجى خانملر نامنه
چوق قصورلى
شاهده
* * *
خانملر رهبرنه علاوه اولونه‌جقدر.
استاديمزه، رمضانِ شريفنى تبريك مناسبتيله يازيلان و إزمير، مغنيسا و حواليسنده رسالۀِ نورڭ أهمّيتلى و تأثيرلى خدمت و إنتشارينڭ و خانملر آراسنده حسنِ تأثيرينڭ بر نمونه‌سى اولان بو مكتوب، عينًا إستانبولده‌كى نورجى خانملرڭ يازدقلرى مكتوب نوعندن؛ إزمير، مغنيسا و حواليسنده مرحوم حافظ على، حسن فيضى و خليل إبراهيم (رحمة اللّٰه عليهم) گبى، قادينلردن ده خالص نور قهرمانلرى چيقديغنى گوسترييور.
﴿بِاسْمِهٖ سُبْحَانَهُ﴾
أى قلبمزده‌كى صوڭسز سَوْگيلريمزى إفاده‌دن عاجز قالديغمز چوق محترم، چوق معزّز و چوق سَوْگيلى استاديمز أفنديمز حضرتلرى!
حلوليله مشرّف اولديغمز رمضانِ شريفڭزى، بتون روح و جانمزله تبريك ايدييورز. قصورلريمزى عفو ايده‌رك بز بيچاره‌لرى نور طلبه‌لرى اولارق قبول بيورماڭزى يالوارييورز.
أى روحمزڭ غداسى و قلبمزڭ أبدى، سونمز مشعله‌سى؛ مادّى و معنوى دردلريمزڭ درمانى و أى قرآنِ معجز البيانڭ عظمتلى، برّاق و صافى نورندن فيشقيران و بتون إنسانلق عالمنى آيدينلاتمق قدرتنى حائز اولان يوكسك أثرڭ ترجمانى اولان استاديمز!
سن، إنسانلرى اللّٰه و رسول اللّٰه يولنه سَوق ايده‌رك حقيقتِ إنسانيه‌يى إدراك و اذعان صاحبى هر گنج و إختياره، عوام و خواصّه تام معناسيله آڭلاتمغه چاليشان و بونده موفّق اولان بر خادمِ ايمانسڭ.
ايشته بو جهتله‌در كه بو عصرده قرآنِ كريمڭ بر معجزۀِ معنويه‌سى اولان رسالۀِ نورى بتون روح و جانمزله و بتون موجوديتمزله صاريلييور؛ تعظيم، تبجيل و تكريم ايدييورز. بزم رسالۀِ نوره اولان بو باغليلغمزى گوشته‌جك هيچ بر قوّت يوقدر. حتّى بونڭ تصوّرى دخى إمكانسزدر. چونكه او، گوڭللر اوزرينه مؤسّس ايمانى بر رابطه‌در. بز، سزڭ و رسالۀِ نورڭ يولندن أصلا آيريلميه‌جغز. و بو أشسز نوردن دائما إستفاده ايده‌جگز إن شاء اللّٰه. چونكه او، ير يوزنده أمثالنه راستلانميان و بوندن صوڭره دخى راستلانماسنه إمكان اولميان بر درياىِ ايمان و بر توحيد خزينه‌سيدر. ايشته بز، بزه بويله أثرلر هديه ايدن سز مبارك و عزيز استاديمزه أبديًا مديون و منّتدارز.
أى مبارك و چوق سَوْگيلى استاديمز أفنديمز حضرتلرى!
منسوب اولديغمز مقدّس دينمز حقّنده كافى درجه‌ده بيلگى ايدينمه‌مز و إستقبالمزى و أبدى سعادتمزى تأمين ايده‌بيلمه‌مز ايچون دينى بر أثر هم ده بو عصرڭ آزغينلاشمش و اوڭنه گچيلمسى پك گوچلشمش كفرى و غيرِ أخلاقى جريانلرندن قورتاره‌جق نورلى و ايشيقلى بر أثر آراركن، نهايت جنابِ حقّڭ لطف و عنايتيله بزه إحسان ايديلن رسالۀِ نورى بولدق و اوقودق. اونده‌كى فيض، هيچ بر أثرده موجود اولماديغندن اونڭ بر خارقه اولديغنى إدراك ايتدك.
چونكه رسالۀِ نور؛ قراران قلبلرى هدايت نوريله آيدينلاتان و بز بيچاره‌لرى ظلمتدن نوره، ضلالتدن حقيقته، دنيا و آخرتده سعادت و سلامته قاووشديراجق بر مرشدِ أكمل و مربّئِ أعظمدر.
بز عاجزلرى بويله أثرلرى اوقومق شرفيله مشرّف قيلان جنابِ حقّه بيڭلر، يوز بيڭلر دفعه حمد و ثنا ايدييورز. بتون دنيانڭ عصرلردن بَرى بكله‌ديگى و نورندن إستفاده ايتمك ايچون جان آتديغى فقط موفّق اولامديغى بويله بر خزينۀِ علميه‌يى بزلره اوقومايى نصيب ايدن او خالقِ ذى‌شانه تشكّرًا آخر عمريمزه قدر سجده‌دن باشمزى قالديرمسه‌ق يريدر. تمنّى ايدييورز كه جنابِ حق، بزلرى رسالۀِ نوردن و سَوْگيلى استاديمزدن أبديًا آييرماسين، آمين آمين آمين!
أى قيمتلى استاديمز أفنديمز!
سز، قرآن و ايمان خدمتى ايچون هر شيئڭزى فدا ايتديڭز. معروض قالديغڭز او قدر شديد ظلم و إشكنجه‌لره و گرفتار ايديلديگڭز چوق مصيبت و بلالره قارشى، صوڭ درجه صبر و تحمّل ايتديڭز. دين و إسلاميت دشمنلرينڭ شدّتلى تضييقلرينه رغمًا وظيفه‌ڭزدن أصلا واز گچمه‌ديڭز. سز، محكمه‌لرده قلبڭزده هيچ بر قورقو حسّ ايتمدن إسلاميتى بِلا پروا مدافعه ايتديڭز. ايتديڭز ده بويله عالى و سعادتِ داريْنه كافى و وافى أثرلر وجوده گتيرديگز و أڭ بيوك ايمان داعيسى اولديڭز. و بويله‌جه بتون بشريته صوڭ بر دفعه اولمق اوزره دينِ حقّى بتون عظمت و شموليله، اولانجه قوّت و شعشعه‌سيله طانيتمق و يايمق و تبليغ ايتمك وظيفۀِ قدسيه‌سيله موظّف بولونديغڭزى إعلان ايتديڭز. بو جهاديڭز سزه مبارك اولسون!
بو قدسى وظيفه‌يى ايفا ايدركن شفقتڭ شاهقه‌سنه يوكسلديڭز. بر قاچ بيچاره‌نڭ جنّته گيرمه‌سى ايچون بتون قوّتڭزله جهنّمه گيرمگه حاضر اولديغڭزى سويله‌يه‌رك و دنياده أمثالنه راستلانمامش و أنگيزيسيون مظالمنه رحمت اوقوتديره‌جق درجه‌ده شديد ظلم و بلالره صبر و تحمّل ايده‌رك بونى إثبات ايتديڭز.
سزڭ او رسالۀِ نورده‌كى مؤثّر سوزلريڭز؛ روحمز، إراده‌مز و أخلاقمز اوزرنده بيوك تأثيرلر وجوده گتيرييور. هله او رساله‌لرڭ شاهى «سوزلر مجموعه‌سى» دفعه‌لرجه اوقونمايه و اوقوتمغه شاياندر. و بويله بر أثرڭ بر چوق متفكّر و علّامه‌لرڭ دخى أللرندن و ديللرندن صدورينه إمكان اولماديغنى سويله‌مك، هيچ ده مبالغه اولاميه‌جغى قناعتنده‌يز.
رسالۀِ نور، هر شيدن اوڭجه إنسانلره بر درسِ عبرت ويرييور. آخرت فكرينى، حساب و كتاب حسّنى إحيا ايدييور. داها دنياده ايكن أهلِ سعادت و أهلِ ضلالتڭ منزللرينى تعيين ايدييور.
بزلر ده رسالۀِ نورڭ بو درسلرينڭ تأثيريله، فانى حياتڭ أنديشه‌لرينى حسّ ايتميه‌جك درجه‌يه گلييورز. و اونى اوقومقله رضاىِ إلٰهيه‌يى تحصيل ايده‌جگمزى و جنابِ حضرتِ رسالت‌پناهى‌يه و اونڭ سَوْگيلى وكيلى و ترجمانِ حقيقيسى اولان سز مبارك استاديمزه قاووشه‌جغمزه صوڭ درجه اينانمش بولونويورز. و حياتمزڭ صوڭ نَفَسلرينه قدر بو اوغورده هر شيئمزى فدا ايده‌جگز. و اوڭمزه گلن هر فلاكتى إذنِ إلٰهى ايله و استاديمزڭ همّتيله يڭه‌جگز. و بزى بو يولدن چويرمك ايسته‌ين غافللره أصلا قولاق ويرميه‌جگز إن شاء اللّٰه.
أى سَوْگيلى استاديمز أفنديمز حضرتلرى!
بز، سزڭ و رسالۀِ نورڭ قيمتنڭ بر ذرّه‌سنى بيله مدح و ثنا ايتمگه مقتدر دگلز. رسالۀِ نورڭ و سزڭ مدحيه‌ڭزى، قدرتلى طلبه‌لريڭز جوشقون لسانلريله، حرارتلى عشقلريله ترنّم ايدييورلر. بز ايسه اونلرڭ آياقلرينڭ ايزلرنده سوروكلنه‌رك تا حضوريڭزه قدر چيقه‌بيلمك ايچون بويله بوزوق لسانمزله بونلرى سزه يازدق. او شهداءِ حقيقت حافظ على و حسن فيضى (رحمة اللّٰه عليهما)نڭ خاطرلرى ايچون بزم بو جرئتمزى خوش گورمه‌ڭزى حضرتڭزدن نياز ايدييورز.
اَلْبَاقٖى هُوَ الْبَاقٖى
إزمير، مغنيسا و حواليسنده‌كى اولادلريڭز
و آخرت همشيره‌لريڭز نامنه
عاصمه، فاطمه، لمعان، عائشه، نائله
* * *
﴿بِاسْمِهٖ سُبْحَانَهُ﴾
گوڭللر فاتحى حضرتِ استاديمز أفنديمز!
سزه، ناصل حضرتِ استاديمز؛ رسالۀِ نورلره ده ناصل نورلريمز، دييه‌رك بتون موجوديتمزله اينانميه‌لم؟ هيچ اينانمامه‌مزه إمكان وار ميدر؟ أوت، حضرتِ استاديمز، نورلى يولڭزڭ حضرتِ پيغمبريمز رسولِ أكرم عليه الصلاة والسلام أفنديمزه گيتمش اولديغنى، دواملى اولارق نورلريمزى اوقومقله آڭلامش بولونويورز.
رسالۀِ نورلرڭ، قرآنِ كريممزڭ حق كتابى اولديغنى گوسترن، بزلرڭ آڭلايه‌بيله‌جگمز، دوشونه‌بيله‌جگمز حقيقتلرڭ شمسندن باشقه بر شى اولماديغنه بتون دنيا شاهد اولمشدر. رسالۀِ نورلر آبِ حيات ترشّحاتنى و شعاعلرينى ، قراران روحلره آقيتمقله، ايچريسنده ياشاديغمز عصرده و گله‌جك دورلرده إنسانيته «وظيفه‌ڭه!» دييه سسله‌نن إلٰهى بر معلّمدر.
قرآنمزدن و ايمانمزدن چوق اوزاق بيراقيلديغمز دورِ سابقده، ضلالت اوچوروملرينه يووارلاتيلوب بيلميه‌رك أبدى حپسلره و إعداملره دوچار ايديلمه‌يه چاليشلديغمز او قراڭلق گونلرده، ألڭزده‌كى قرآنڭ نورلى و ألماس قلنجى ايله گلديڭز، بارلا يايلاسنه اينديڭز. دينسز فلسفه و طبيعيّونلره بوين أگديرديڭز، ديز چوكديرديڭز. بتون قره دوشونجه‌ليلرى إلزام ايده‌رك قومونيزم، سييونيزم و ماصونلرڭ بللرينى بر داها تداوى ايديلمه‌مك اوزره قيرديڭز.
جنابِ حقّڭ سزى و طولاييسيله نورلرى، أهلِ ايمانى ايمانِ تحقيقى‌يه يوكسلته‌رك أبدى ظلمت يرينه أبدى سعادت تأمين ايتمه‌لرى ايچون إحسان ايتمش اولديغنه هيچ شبهه‌مز قالمادى. سزه حضرتِ پيغمبريمزڭ يگرمنجى عصرده‌كى ألچيسى و قرآن حزبنڭ قورتاريجيسى ديمكله، بر حقيقتى إفاده ايتمش اولديغمزه اينانييورز.
قرآنمز، گوه‌زه عقللرڭ فلسفه‌سى ديليله حالا إنكار ايديلمك ايسته‌نيركن، رسالۀِ نور، قرآنڭ بر آيينه‌دارلغنى ياپارق بز عواملره ده بو كتابڭ اللّٰه قانونى اولديغنى و آنجق بو قانونڭ أبدى سعادته گوتورن بر رهبر بولونديغنى آپ آشكار گوسترييور. دون بيلمييوردق، بوگون آڭلايورز كه علوى دينمز اولان و سماوى دينلرڭ سوزلمشى و بتون روحلرڭ غداسى بولونان بو گونشى إنكار ايديجيلرڭ دورنده اويله‌سنه بر ذهنيت بليرمش كه بو فجيع و قورقونج ذهنيت، نه فرعونلرده و نه ده أبو جهللرده موجود دگلمش.
بوگون نشر ايديلن بو تاريخچۀِ حياتڭزده ده گورولويور كه سز حضرتِ استاديمز بديع الزمانه تطبيق ايديلن ظلملر، بارلا يايلاسنه نفيڭز ايله باشلايور. إسپارطه، أسكيشهر، قسطمونى، دڭزلى، أميرطاغ و آفيونه نفى ايديلمه‌لريڭزده ظاهرًا دين دشمنلرى طرفندن سورگون ايديلمشديڭز. حقيقتده بيڭلرجه أهلِ ايمانڭ و حق سوزه حسرت مكتبليلرڭ گوڭللرينى فتح ايده‌رك قورتاره‌جق ربّانى بر مأمورديڭز. هم اونلره يول گوستره‌جك حقيقى بر ئورنكديڭز. گله‌جك نسللرى إعدامِ أبدى‌يه محكوم ايتمك ايسته‌ينلر، سز استاديمزى دفعه‌لرجه زهرله‌مشلرسه ده او زهرلر بو جنايتڭ عظمتندن اوركمشلر و برر پانزهر حالنه منقلب اولارق أهلِ كفر و ايمان ايچون آييريجى برر وثيقه اولمشلردر.
سز حضرتِ استاديمز، بزم قورتاريجيلغمزه تعيين ايديلمش اولديغڭزدن اللّٰهڭ إذنى ايله إعدام سهپالرى دخى برر إعلاننامه حكمنه گچمشدر. آنقره دعواسنده قهرمان إختيار و گنج آغابگلريمز؛ دون بيڭلر اولان، بوگون ميليونلرى آشان طلبه‌لريڭزڭ يوكسك سجيه‌لرينى بتون إسلاميت نامنه إثبات ايدن برر ئورنك اولديلر.
آنقره برنجى آغير جزا محكمه هيئتنڭ قارشيسنده، نورلى قارداشلريمزڭ برنجى محاكمه‌لرنده بولوندق. قونيه‌دن اوچ نورجى قادين قارداش بولونمشدق. يوزلرجه قادين و أركك قارداشلريمزله، حقّڭ حقيقتنى گوردك و شاهد اولدق. بر آووقات آغابگمز، هويتى و مسلگى صورولديغى زمان «رسالۀِ نورڭ خدمتكارى‌يم.» ديمشدى. رسالۀِ نورى ناصل طانيديغنى آڭلاتيركن «١٩٥٢ده نورلرى طانيدم. ١٩٥٤ده خدمتلرينه گيردم. ١٩٥٧ده حقوق فاكولته‌سنى بيتيروب كنديمى نورلرڭ خدمتنه ويردم.» ديمه‌سيله گوزياشلرى ايچريسنده قالدق. «اللّٰه اللّٰه» ديمكدن كنديمزى آلامدق. سز حضرتِ استاديمزدن و نورلرڭ خدمتنده بولونان آغابگلريمزدن اللّٰه راضى اولسون.
قيمتلى استاديمز أفنديمز!
سزڭ مبارك دعالريڭز حرمتنه، جنابِ اللّٰهمزڭ لطف و إحساناتى ايله قونيه‌ده نورلرى اوقويانلر گوندن گونه چوغالمقده اولديغنى سز حضرتِ استاديمزه مژده ايتمك و ايمان قورتارمه دعواسنده‌كى ظفريڭزڭ شاهدى اولارق سزى تبريك ايتمك شرفنى بزلره بخش ايدن جنابِ اللّٰهمزه نه قدر شكر ايتسه‌ك آزدر. دونكى مدرسۀِ يوسفيه‌نڭ بر مثالى اولان حپسخانه‌لرڭ دمير پارمقلقلرينى نورڭ شعاعلريله أريته‌رك، او نورلرڭ أكمك گبى أولريمزه گيرمه‌لرينه واسطه اولان خدمتڭزڭ معاقبلرينڭ بيڭلر دگل، يوز بيڭلر دگل، ميليونلرى آشديغنى ده آيريجه ايشيدييورز، شاهد اولويورز.
أولريمزڭ برر مدرسۀِ نوريه اولديغنى شو مكتوبمزله بيلديرمك وسيله‌سى ايله سز حضرتِ استاديمزه دييورز كه: سز، مشركلرڭ أللرندن بزلرى قورتارديڭز. أللريمزه برر نشانۀِ نجات اولارق ايمان وثيقه‌لرينى ويرديڭز. سزڭ خدمتڭزله بزلر، شو گنجلك هوساتمزدن فراغت ايدوب نورلره صاريلدق. دگل طوپراقلريمزده، بتون دنياده نورلريمزله برابر ظفرلردن ظفرلره گيده‌جگمزه اينانييورز. بو ظفر، اللّٰهه گيدن نورلرڭ ظفريدر. بو ظفر، عصرِ سعادتده پيغمبريمزڭ آچديغى نورلى يولى تعقيب ايدنلرڭ ظفريدر. بو ظفر، ايمانليلرڭ ظفريدر. غلبه إسلامڭدر. مغلوبيت ايسه دونكى و بوگونكى دينسز گروهلرڭدر. ايمانلى گوڭللرى هيچ بر قوّت مغلوب ايده‌ميه‌جگنه، بتون دنيا شاهد اولمقده‌در. رسالۀِ نورڭ ايمان خدمتنده‌كى ظفرى بونى بر كره داها گوسترييور.
سز اولماسه ايديڭز؛ بز، بو عصرڭ رياكارلقدن عبارت فانى زينتلرينى «مدنيت عصرينڭ أمرى» دييه چوقدن قلبلريمزه يرلشديرمش، روحلريمزى ألماس سويه‌سندن ملوّث كومور ماهيتنه دوشورمش اولاجقدق. جنابِ حق سزڭ واسطه‌ڭزله بزلره نورلريمزى إحسان ايتمش اولديغندن نورلريمزڭ ايشيغنده او ظلمتلى گيجه‌لرله، او دسّاسلر مدنيتنڭ چركينلكلرينى آپ‌آچيق گوره‌بيلييورز. اللّٰهمزڭ بو عنايتنه حمد و ثنالر ايدرز.
بو عصرڭ نه قورقونج و نه دهشتلى بر عصر اولديغنى گوره‌بيلمكلگمز ايچون آنجق و آنجق تحقيقى ايمانڭ دوربينى ايله سير ايتمكلگمز ايجاب ايدييورمش. ايمان دوربيننى قلب و گوزلرينه طاقميانلرى، لهوياتلرى محاسن گوسترن شو ميمسز مدنيتڭ ضلالت باتاقلقلرى يوتابيلير دوشونجه‌سيله، بز نور شاكردلرى چوق اوزولويوردق. فقط نورلر، آوروپاليلرڭ ده روحلرينه گيره‌رك لهوياتلرينى گوندن گونه تميزله‌مكده اولديغنى، گلن مكتوبلردن اوگرنمش بولونويورز.
بزلر ايسه بوگون ايمانڭ نورى ايله دييورز كه: أى يگرمنجى عصرڭ مدنيت عصرى اولديغنى إدّعا ايدن دينسز فلسفه! دينسز، طبيعيّون ماصونلرله قيزيل موسقوفلر! بزلر سزلره بو وطنڭ گوزل طوپراقلرندن و اورته آناطولى‌ده حضرتِ مولانا‌نڭ قوجاغندن سسلنه‌رك حضرتِ محمّد عليه الصلاة والسلامڭ اُمّتى، مولانا‌نڭ طورونلرى و بديع الزمان سعيد النورسى‌نڭ طلبه‌لرى‌يز. سزلر ده بزلرى ايى طانييڭز. سنڭ مدنيتنى ماضى مزارلغنه گوممش بولونويورز. يرينه پك تازه يگرمى برنجى عصرڭ گونشى طوغمق اوزره‌در. بو گونش إسلاملرڭ گونشى، نورلرڭ گونشى و طولاييسيله نورجيلرڭ گونشى اولارق طوغه‌جقدر إن شاء اللّٰه.
حضرتِ استاديمز أفنديمز!
شو لسانِ پرقصوريمزله سزڭله ايمان يولنده، اللّٰه يولنده، قرآنمزڭ رهبرلگنده حقّڭ حقيقتنى قبول ايديشمزڭ برر وثيقه‌سنى بليرتمكله بو عصرڭ أڭ بختيار إنسانى اولديغمزه اينانييورز. زيرا بوگون دخى بر طلبه نظريله باقمش اولديغڭز شو فانى وجوديڭز اللّٰهڭ ياننده، بزلرڭ ياننده أبديدر. چونكه معرفت اللّٰهه متوجّه اولان قلبلريمز، ايمان قوّتيله چارپمقده‌در. بو قوّت بزلرى اللّٰه يولندن، پيغمبريمز رسولِ أكرم عليه الصلاة والسلام أفنديمزڭ رهبرلگندن، نورلريمزدن آييرميه‌جق إلٰهى بر قوّت اولمشدر إن شاء اللّٰه.
اللّٰهڭ إذنى ايله قلبلريمزه رسالۀِ نورڭ و نورلريمزڭ ويرمش اولديغى فيضلرله بو مكتوبى يازدق. سز استاديمزى خسته حاللرنده پك فضله مشغول ايتديگمزدن قصورلريمزڭ عفوينى آيرى آيرى رجا ايدر، جنابِ اللّٰهدن شفالر ديلرز و ليلۀِ معراجڭزى تبريك ايدرز.
اَلْبَاقٖى هُوَ الْبَاقٖى
پك چوق دعالريڭزه محتاج
قونيه‌لى خانملر نامنه
گولسون، ألماس، فردوس، مديحه، عائشه، خديجه، فاطمه، صالحه، شكران، مشرّف، زهرا، عائشه، نوران
* * *
حسن فيضى، خليل إبراهيم مِثللو نورڭ قهرمانلرى گبى إستانبولده قادينلر طائفه‌سندن نورلره خارقه بر علاقه‌دارلق گوسترن خانملرڭ مكتوبيدر.
﴿بِاسْمِهٖ سُبْحَانَهُ﴾
چوق محترم، چوق مبارك، بيوك استاديمز أفنديمز حضرتلرى!
بز ضعيف بيچاره‌لرى طلبه‌لگه قبول ايتديگڭز ايچون پك چوق سَويندك. دنيالر بزم اولدى. گوزلريمز سَوينج ياشلريله طولدى. آغلادق… و آغلايه‌رق ربّمز تعالى حضرتلرينه حدسز شكرلر ايتدك. جنابِ حق بو فقيرلرى، يوز اوتوز دانه أشسز أثرلرى هر يرده عشقله اوقونان سز گبى دنياده بر تك بديع الزمان اولان حشمتلى بر استادڭ دعالرينه داخل أيلدى. بو زمانڭ أڭ بيوك ذاتى اولان رسالۀِ نور صاحبنڭ طلبه‌سى اولمق گبى چوق بيوك بر شرفه، چوق بيوك بر نعمته واصل ايتدى.
آه استاديمز، نه ياپالم! هديه قبول ايتمييورسڭز كه هديه گوندره‌لم. سز، بزم أبدى حياتمزى قورتارديڭز. بز سزه، أڭ كوچك بر اييلك دخى ياپامييورز. گرچه دنيالر طولوسى اييلك ايديلسه ينه سزڭ بزى ايمانِ كامله ايريشديرن رسالۀِ نور گبى بيوك بر لطفڭزه مقابل گله‌مز. جنابِ حق سز استاديمزدن أبديًا راضى اولسون؛ عافيتلر، شفالر ويرسين. و بزلرى استاديمز بديع الزماندن آييرماسين، آمين!
أى ربّمز! سَوْگيلى پيغمبريمز حبيبڭ حرمتنه، بو دعامزى قبول أيله، آمين!
بيوك استاديمز أفنديمز! كنديمزده سزه طلبه اولمغه لياقت گورمييورز. سزڭ بزلره اولان چوق شفقتڭز، پك زياده حميتڭز؛ بزلرى دنياده، آخرتده سعادتلره قاووشديران رسالۀِ نور طلبه‌لگنه داخل ايتمكده‌در. رسالۀِ نورى اوقويورز. آخرت همشيره‌لريڭز رسالۀِ نوره چوق مشتاقدرلر. برابرجه اوقويورز. نور رساله‌لرندن چوق هم پك چوق إستفاده‌لر ايدييورز. بزلر شيمدى‌يه قدر رسالۀِ نورده قادينلره ويريلن چوق قدسى درسلرى؛ هيچ بر كتابده گورمدك، هيچ بر خواجه‌دن ايشيتمدك. او پك قيمتلى، پك گوزل، پك طاتلى ايمان حقيقتلرى بزم روحمزڭ غداسيدر.
رسالۀِ نورده‌كى مقدّس قرآن حقيقتلرى بزم قلبلريمزه ايشله‌يور، قلبمزده نوردن محبّت آلَوْلرى يانديرييور، ايمانمزه قوّت ويرييور، معنوياتده درجاتمزى يوكسلتييور. رسالۀِ نور بزى فتنه‌لردن اوزاقلاشديرييور، طريقِ مستقيمه، قرآن يولنه إنتساب ايتديرييور. بزى شيطانلرڭ، جنّيلرڭ و بزى دين پرده‌سى آلتنده آلداتيجى، قانديريجى كيمسه‌لرڭ شرلرندن أمين قيلييور. حق تعالى حضرتلرى سز استاديمزدن أبديًا راضى اولسون، اوزون عمرلر ويرسين. سز استاديمزه اولان شكرانلريمز صوڭسزدر.
سَوْگيلى پيغمبريمز رسولِ أكرم عليه الصلاة والسلام أفنديمز، سز استاديمزه و نور طلبه‌لرى قارداشلريمزه ايمان و قرآن خدمتنده أبديًا معين و يارديمجى اولسون. جنابِ حق، سزلرى بو قرآن خدمتنده موفّق أيله‌سين، آمين آمين آمين!
استاديمز أفنديمز حضرتلرى!
ناصل درد يانالم! إفساد قوميته‌لرى، دين دشمنلرى، دسيسه‌لرله بز قادينلرى إفساد ايتديلر؛ چوقلريمزى إسلاميتدن اوزاقلاشديرديلر. بزى يوكسك إسلام تربيه‌سندن، يوجه إسلام أدبندن محروم ايتديلر. حالا ده دينمزه ضررلى شيلرى بزه آشيلامه‌يه چاليشييورلر. حدسز حمد و ثنالر اولسون ربّمزه كه رسالۀِ نور بزى بونلره قاپيلمقدن دخى قورتاردى. رسالۀِ نوره نائل اولونجه قلبلريمزه نورلر ياغدى. روحمزده نورلى عالملره پنجره‌لر آچيلدى. نور رساله‌لرينى اوقودقجه ايمانمزه، مقدّس دينمزه باغليلغمز زياده‌لشدى. پيغمبريمز حبيبِ ذى‌شان أفنديمزه محبّتمز فضله‌لاشدى. اللّٰهه اولان إطاعتمز، سَوْگيمز، عشقمز صوڭسز بر حاله گلدى. نورلرى اوقودقجه دينمزه، ايمانمزه ضرر ويرن شيلرى آييرد ايتمگه باشلادق.
دينى بر درس ويرييورم، دييه بز صافدل قادينلرى آلداتوب ياڭليش يوللره بزى تشويق ايدن كيمسه‌لره گيتمز اولدق. چونكه رسالۀِ نور بزم گوزيمزى آچدى. رسالۀِ نورى اوقومدن أوّل بونلرى بيله‌مييوردق. باشقه شيلره، باشقه هوسلره اويارق گناهلر ايشلييورمشز. پاك إسلام قادينلغنڭ شرفنه ياقيشميان، آوروپالى گاوورلرڭ وضعيتلرينى تقليده قاپيلييورمشز. رسالۀِ نور بزى جهالتدن، او چركين شيلردن قورتاردى. گناهلردن اوزاقلاشديردى، ثوابلره نائل قيلدى. رسالۀِ نور بزم هر درديمزه درمان، آجيلريمزه نورلى برر مرهم اولدى. شيمدى ايمان ايدييورز كه رسالۀِ نور هر شيئه دوادر. بو پك نورانى، پك فيضلى أثرلر بزه كافيدر. باشقه شيلره گيتمگه، آرامغه إحتياج بيراقمييور.
بز قادينلر، الحمد ِللّٰه دينمزه باغلى‌يز. فقط بز؛ بزه حقيقى بر صورتده دينمزى اوگرته‌جك، بزى عبادته، گوزل عمللره، گوزل أخلاقه سَوق ايده‌جك أثرلردن محروم ايديلدك. دينسزلر قادينلرى شاشيرتديلر. بونڭ ايچون بزه قرآن يولنى اوگرتن إسلاميتڭ نورلى، سلامتلى جادّه‌سنده ايمان علمنى تحصيل ايتديره‌رك يوروتن نور رساله‌لرى گبى بر مرشدِ كامل لازمدى. بوڭا چوق محتاج ايدك. بزى أبدى سعادتلره نائل قيلاجق، بزى قرآن نورلريله نورلانديراجق، قرآنِ كريمڭ صوڭسز فيضلريله فيضلنديره‌جك نور رساله‌لرى گبى بر استاده، بر أثره إحتياجمز فضله ايدى. ديمك بو نورلرى، بو أثرلرى، بو استادى گورمييورمشز. ديمك غفلتده ايمشز. گوردك، آييلدق، اوياندق، رسالۀِ نوره صاريلدق. باشقه‌لرينڭ آلداتمالرندن قورتولدق. نور رساله‌لرنده‌كى قرآن، ايمان نورلرينه ايريشدك. الحمد ِللّٰه، اللّٰهڭ بو بيوك لطف و كرمنه حدسز شكرلر ايدرز.
استاديمز! بز نور رساله‌لرينه روح و جانمزله صاريلييورز. خانملر رهبرى، گنجلك رهبرى، كوچك سوزلر، خسته‌لر رساله‌سى، إختيارلر رساله‌سى بزم أڭ بيوك رهبريمزدر. بزم آجيلريمزى گيده‌رن نورانى درسلريمزدر. خانملر رهبرى، دفعه‌لرجه اوقونمايه شايسته بر أثريڭزدر. اوقودقجه اوقومق شوقى طوغويور. گنجلك رهبرينى تكرار تكرار اوقويورز. تكرار ايتدكجه آڭلايشمز آرتييور. روح و قلبلريمزده تأثيرى زياده‌لشيور.
سوزلرى، خسته‌لر رساله‌سنى، إختيارلر رساله‌سنى صيق صيق اوقويورز. بو رساله‌لره، بزلر أكمكدن، صودن، هوادن زياده محتاج اولديغمزى؛ اوقودقجه إدراك ايدييورز، آڭلايورز. بويله بويله نور رساله‌لرينى دَور ايدييورز. نور رساله‌لرى بزم روحمزدر، قلبمزدر، باشمزڭ تاجيدر، گوڭلمزڭ نوريدر. نورلرى سينه‌مزه باصييورز. اونلرى يانمزدن، ديلمزدن، چانطه‌مزدن أكسيك ايتمييورز.
استاديمز! نور رساله‌لرنده‌كى ايمان نورلرى، برر گُلِ محمّدى عليه الصلاة والسلام گبيدر. بز، بو أثرلريڭزڭ بزه نه قدر فائده‌لى اولديغنى؛ روحمزه، قلبمزه نه درجه تأثيرلر ويرديگنى ديله گتيرمكدن عاجزز.
استاديمز! نور طلبه‌لرينڭ اوقودقلرى بر أشى، بر بڭزرى داها دنياده اولميان «جوشن الكبير» إسملى پيغمبريمز عليه الصلاة والسلام أفنديمز حضرتلرينڭ دعاسنى و چوق ثوابلى چوق نورلى چوق فضيلتلى صلواتِ شريفه‌لريڭزى ألده ايتدك، اوقومغه باشلادق. سزڭ دوام ايتديگڭز بو پك قيمتدار، چوق مبارك أورادلر؛ بزم ذكريمز، بزم وردمز اولدى الحمد ِللّٰه! فقط أڭ زياده رساله‌لرى اوقومغه غيرت ايدييورز، أهمّيت ويرييورز. چونكه نور رساله‌لرينى نه قدر صيق صيق اوقورسه‌ق بو دعالردن داها زياده فيض آلييورز. دعالرى، أورادلرى مبارك گيجه‌لرده، خصوصًا ليلۀِ رغائب و ليلۀِ معراج و ليلۀِ برات، ليلۀِ قادر و جمعه گيجه‌لرى گبى وقتلرده اوقويورز.
جنابِ اللّٰه، شفقته چوق محتاج اولان بز قادينلره؛ سز گبى چوق شفقتلى، چوق مرحمتلى بر ذاتى استاد أيلدى. دنيا يوزنده أڭ طوغرى و أڭ يوكسك أڭ حقيقى أڭ بيوك بر مرشد اولان نور رساله‌لرينى بزلره إحسان بيوردى.
فانى بر استاده ياپيشمامشز كه او وفات ايدنجه بز مرشدسز قالالم. ئولمه‌ين، باقى اولان قرآن تفسيرى رسالۀِ نور گبى أبدى بر استاد وار. استاديمز أبديًا بزه استادلق ايده‌جك، بزه حامى اولاجق، بزى ئولونجه‌يه قدر نورلانديراجق إن شاء اللّٰه.
اللّٰهمزه چوق شكرلر اولسون، بز آرتيق يوكسك بر مكتب اولان نور مكتبنه گيردك. قرآن نورلرينه إنتساب ايتدك. رسالۀِ نور بزم يوكسك درسلريمزدر. رسالۀِ نور؛ أڭ بيوك نور قايناغى، أڭ زنگين فيض خزينه‌سيدر. بز قادينلر نور طلبه‌لگيله إفتخار ايدييورز، شرف طويويورز. بو آلداتيجى زمانده، تهلكه‌لرڭ إنسانيتى بوغديغى بو عصرده؛ قورويوجى أڭ بيوك قلعه، رسالۀِ نوره طلبه اولمقدر. رسالۀِ نور طلبه‌لگى، أڭ بيوك بر شرفدر. قرآن حقيقتلرينى قلبمزه، روحمزه، عقلمزه ايشله‌ين نور رساله‌لرينه إنتساب ايتمك؛ قرآنه إسلاميته إنتساب ايتمكدر.
بِالخاصّه قادينلرڭ صافيتندن إستفاده ايده‌رك آلداتيجى كيمسه‌لرڭ چوق اولديغى بو قاريشيقلق دورنده؛ أڭ مستقيم يول، أڭ طوغرى رهبر، أڭ حقيقى استاد رسالۀِ نوردر. رسالۀِ نور، قرآن يوليدر. رسالۀِ نور، ايمان و إسلاميت يوليدر. أڭ گوزل، أڭ شيرين، أڭ ذوقلى نورانى حقيقتلر رسالۀِ نورده‌در. إنسان كلمۀِ توحيدڭ ذكرينى ياپاركن، قرآن اوقوركن ناصل إلٰهى بر عشقله طولارسه رسالۀِ نورى اوقوركن، ديڭلركن ده اويله اولويور.
چونكه رسالۀِ نور، باشدن باشه كلمۀِ توحيدڭ حقيقتلرينى درس ويرييور. قرآن حقيقتلرينى، توحيد حقيقتلرينى بزه آڭلاته‌رق قلبمزه، عقلمزه، روحمزه نقش ايدييور. هپسنى لايقيله آڭلايه‌ماسه‌ق ده آڭلايه‌بيلديگمز قدرى بزى قورتارييور. آڭلايه‌مديغمز يوكسك حقيقتلرى ده معنًا بزه تأثير ايدييور، فيضلنديرييور، نورلانديرييور. اونڭ ايچون نور رساله‌لرى دفعه‌لرجه اوقونويور، تكرار تكرار مطالعه ايديلييور.
استاديمز أفنديمز حضرتلرى!
سز آلداتميان، ئوزى سوزى بر اولان، علميله عمل ايدن حقيقى بر استادسڭز. أڭ مستقيم، حقيقى بر مرشدِ كاملسڭز. سزه تكليف ايديلن هديه‌لرى شيمدى‌يه قدر ردّ ايتمه‌مش اولسيديڭز، آلتندن سراى ياپديررديڭز. سز نور رساله‌لريله حقيقى بر استاد، حقيقى أڭ بيوك بر مرشدسڭز كه كنديڭز ايچون دنيا منفعتلرينى طوپلامديڭز، دنيا ثروتلرى پيدا ايتمديڭز. دنيايى ترك ايتديڭز. صِرف اللّٰه رضاسى ايچون ايمان درسلرى ويرديڭز، قرآنه خدمت ايتديڭز. ايشته سزده‌كى بو إخلاص ايچوندر كه بز قادينلر و ميليونلرجه أرككلر، إختيارلر، گنجلر كتابلريڭزه صاريلييورلر، درسلرڭزه إعتمادله دوام ايدييورلر. دين ايچون، ايمان ايچون فدائى اولويورلر. رسالۀِ نور اوغرنده بتون مشكلاتلره گوگس گرييورلر. سزڭ سوزلريڭزه چوق أهمّيت ويرييورلر، اينانييورلر.
سز، قرآنِ كريمده قادينلرڭ قيمتنى، عفّت و عصمتنى محافظه ايدن، اونلرى پيس نظرلردن قورويان آيتى تفسير ايتديگڭز ايچون دينسزلر سزى إعدام محكمه‌سنه ويرديلر، زندانلره آتديلر. او محكمه‌لرده، سزه ويريله‌جك ئولوم جزاسندن هيچ قورقماديڭز. تحمّل ايديلمز إشكنجه‌لره تحمّل ايتديڭز، ييلماديڭز. ينه او آيتِ كريمه‌نڭ تفسيرى اولان و قادينلغڭ حقوقنى مدافعه ايدن رساله‌ڭزى متانتله مدافعه ايتديڭز. بو عصرده كوتو شيلر ايچنده بيراقيلان و دينى، حقيقى بر قورويوجى‌يه پك محتاج اولان قادينلرى؛ معصيتدن قورويان، يوكسلتن رساله‌ڭزى ينه نشر ايتديڭز، بزلرڭ إمدادينه يتيشديرديڭز.
بزه أفنديلريمز دييورلر كه: «بو اوتوز قرق سنه ايچنده، قادينلرى مدافعه ايدن إسلامى بر أثرى يازمغه هيچ بر كيمسه جسارت ايده‌مدى. بويله بر أثرى، دينسزلرڭ إشكنجه‌لرى ايچريسنده آنجق بديع الزمان يازه‌بيلدى. قادينلق عالمنه بيوك بر رهبر اولدى.»
استاديمز! سز، دينسزلرڭ چوق اولديغى بويله بر زمانده، سزى إعدام ايتمك ايچون گوتوردكلرى محكمه‌لرده قرآنى و إسلاميتى مدافعه ايتديڭز.
مرشدِ كاملڭ ناصل بر ذات اولاجغنى، عبد القادرِ گيلانى (رض)، شاهِ نقشبند (رض)، إمامِ ربّانى (رض) حضرتلرى گبى بيوك ذاتلرڭ كتابلرندن اوگرنن قارداشلريمز واردر. بزلر، أڭ بيوك بر استادڭ، أڭ بيوك بر مرشدِ كاملڭ شرطلرينى، حاللرينى، أوصافنى تمامًا سزده بولويورز، أثرلريڭزده اوقويورز. مرشدِ كامل آنجق يوقاريده بر ايكى وصفنى أرض ايتديگمز شكلده اولان بر ذاتدر. بز آنجق اويله اولان سز گبى بر استاده و أثرلرينه باغلانيورز. چوجقلغڭزدن بَرى إستقامتله گچن سزڭ حاللريڭزى چوقلر عينًا گوردكلرى گبى محكمه‌لرده ده سزڭ حالڭز عيان بيان اولدى. بونلر، سزڭ بو زمانده أمثالى اولميان أثر صاحبى أڭ بيوك بر ذات اولديغڭزه دليلدر.
سزڭ رسالۀِ نور أثرلريڭزه جان و گوڭلدن إعتماد ايدييورز. نورِ قرآنى سَوْگيله، محبّتله اوقويورز. سز بتون عمريڭزده‌كى حاللريڭزله، پيغمبرِ ذى‌شان أفنديمز حضرتلرينڭ گيتديگى قرآن يولنده گيدييورسڭز. دينى أثرلرڭ ياساق ايديلديگى آجى گونلرده، ايمانى قورتاران نور رساله‌لرى گبى أثرلر ويرديڭز.
حضرتِ پيغمبر أفنديمزڭ يولنى تام تعقيب ايتديگڭزدن إعداملردن محكمه‌لردن، ظلملردن قورقماديڭز. و اللّٰهڭ عنايتيله، يوز اوتوز پارچه نور رساله‌لرينى وجوده گتيرديگز. شاهلانمش آرسلانلر گبى إسلام ديننى إعدام محكمه‌لرنده مدافعه ايتديڭز.
معزّز استاديمز!
يگرمى سنه‌دن بَرى رسالۀِ نوره خدمت ايدن قيمتدار طلبه‌ڭز، محترم والده‌مز آسيه خانم بوراده‌در. بزلره رسالۀِ نورى طانيتدى. قادينلر آراسنده ايمانه، رسالۀِ نورله بيوك خدمتلر ياپدى. آنقره‌ده‌كى آننه‌مز رسالۀِ نوره إخلاصله خدمت ايدييور. چوق خانملرڭ رسالۀِ نورله مسعود اولمالرينه، ايمانلرينڭ قورتولمسنه وسيله اولويور. آفيون حواليسنده‌كى شهادتلى، نورلى، فعاليتلى نورجى قارداشمز رسالۀِ نورڭ مسلگنه اويغون اولارق خدمت ايدييورمش. بر چوق خانملر، گنج قيزلر اونڭ واسطه‌سيله رسالۀِ نوردن ايمان درسى اوقومق بختيارلغنه ايريشييورلرمش. آنطاليه‌ده ده بر چوق نورجى قارداشلريمزڭ رسالۀِ نوره چاليشدقلرينى، رسالۀِ نورى يازدقلرينى ايشيتدك، چوق مسرور اولدق. هم نورلره چاليشان بو نورجى قارداشلريمزه هم وطنمزده‌كى بتون آخرت قارداشلريمزه دعالر ايدر، اونلرى روح و جانمزله تبريك ايدرز.
اوزون يازدق، عفويڭزى يالوارييورز؛ نورڭ محبّتى، نورڭ سَوْگيسى بزى طورديرمييور. دائما نوردن قونوشويورز. هر زمان ديلمزده، قلبمزده، روحمزده نورڭ سَوْگيسى… نور اوقويه‌جغز… نور طاشييه‌جغز… نور ياياجغز إن شاء اللّٰه…
آنقره‌ده رسالۀِ نور، مطبعه‌لرده بيڭلرجه باصيلييورمش. بو، أڭ بيوك بايراممزدر. بو بايرام، بتون دنياده‌كى دين قارداشلريمزڭ بايراميدر. بونڭ ايچون باشده سز استاديمزى و بتون رسالۀِ نور طلبه‌لرينى تبريك ايدرز. بوراده‌كى رسالۀِ نورله علاقه‌دار آخرت همشيره‌لريمز و بزلر سزه پك چوق سلاملر و دعالر ايدييورز. أڭ بيوك حرمتلريمزله أللريڭزدن اوپه‌رز.
استاديمز أفنديمز حضرتلرى!
بز بو دهشتلى زمانده، رسالۀِ نوردن آلديغمز درسلرله ايمانى قزانمق گبى نهايتسز بر سعادته نائل اولديغمزدن طولايى قلبمزه طوغان شكرانلريمزى ايشته بو صورتله يازدق. أگر ألمزدن گلسه رسالۀِ نورڭ قادينلره و بتون إسلام ملّتلرينه ويرديگى فائده‌لرى، بيڭلرجه صحيفه‌لر طولوسى قلمه آلاجغز. امّا ممكن دگلدر.
اويله بر زمان گله‌جك كه ميليونلرجه قادينلر، نور رساله‌لرينڭ دائره‌سنه، پروانه‌لر گبى رسالۀِ نور درسلرينه قوشاجقلر. رسالۀِ نوردن قدسى ايمان درسلرينى آلاجقلر، ديڭله‌يه‌جكلر. نور سماسنده نورلر تنفّس ايده‌جكلر. جنّت الفردوسى قزانديران ايمان نعمتنه نائل اولاجقلردر.
چوق شفقتلى، چوق مرحمتلى استاديمز!
رسالۀِ نورڭ بو بيوك بايرامنى تكرار تبريك ايدرز. بز، سز مشفق استاديمزدن، رسالۀِ نوردن ئولونجه‌يه قدر آيريلميه‌جغز. سز و رسالۀِ نور؛ دنياده مرشديمز، آخرتده شفاعتجيمزدر. جانمز، نورِ قرآن و ايمان اولان رسالۀِ نوره و قرآن دلاّلى سز استاديمزه قربان اولسون. هر شيئمز رسالۀِ نوره فدا اولسون.
اَلْبَاقٖى هُوَ الْبَاقٖى
إستانبولده دعاڭزه محتاج طلبه‌لريڭز و معنوى أولادلريڭز
خير النساء، سيّده، أمينه، فاطمه
* * *
نورجيلرڭ قصيدهسى (*)
___
(❊): عسكرلرڭ «آننه‌م بنى يتيشديردى، بو وطنه يوللادى.» مارشنه بر نظيره اولارق يازيلان بو قصيده، او مقامده و غزالى حضرتلرينڭ «أى رسالت تختنڭ خورشيدِ ماهِ أنورى» نعتِ شريفى مقامنده اوقونه‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌بيلير.
___
آننه‌م بنى يتيشديردى، بو خدمته يوللادى
تسليم ايتدى رساله‌يى، اللّٰهه ايصمارلادى
بوش اوطورمه چاليش ديدى، خدمت أيله ايمانه
سوتم سڭا حلال ايتمه‌م، چاليشمازسه‌ڭ قرآنه
يازديغمز رساله‌در، اوقويورز قرآنى
بز نورلرڭ يارديميله حفظ ايدرز ايمانى
مدرسۀِ نوريه‌در صاو و بارلا، أفلانى
شاكردلره مظاهردر عبد القادر گيلانى
مباركلر هيئتيله نور و گُل فابريقه‌سى
قلملرى قلنج گبى زمانڭ خارقه‌سى
حپسخانه ديدكلرى اولدى برر مدرسه
گنج، إختيار، قادين، أركك قوشويورلر بو ديرسه
تمام اوتوز بش سنه‌در كفرله ايتدى جهاد
تاريخِ إسلامده پك أندر گورونور بو ثبات
أى نورجيلر! أى نورجيلر! أى مبارك قارداشلر!
هر آن سزدن راضى اولسون اللّٰه ايله پيغمبر…
* * *
فهرست
آخرت همشيره‌لرم ايله بر محاوره‌در ٥
إختيار قادينلره بر مژده و بر إخطار ١٧
گنج نورجى قيزلره عائد مكتوبه أك ٢١
أهمّيتلى بر حقيقته قيصه بر إشارت ٢٢
خارج مملكتلرده صوريلان بر سؤاله جواب ٢٤
إختيارلر رساله‌سندن «يدى رجا» ٢٩
يگرمى دردنجى لمعه (تستّر حقّنده) ٤٨
يدنجى مكتوب ٥٧
مناظراتدن بر سؤال جواب ٦١
اوتوز ايكنجى سوزدن ايكنجى نقطه‌نڭ ايكنجى مبحثى ٦٣
اون يدنجى مكتوب (چوجق تعزيه‌نامه‌سى) ١٠٥
چوجق وفاتيله مناسبتدار بر پارچه ١١١
أميرطاغنڭ معنيدار بر خاطره‌سى ١١٣
اون يدنجى لمعه‌دن «اون ايكنجى نوطه» ١١٦
أميرطاغ لاحقه‌سندن ايكى مكتوب ١٢٠
إستانبول خانملرينڭ مكتوبى ١٢٣
ايمانه فداكارانه خدمت ايدن بر خانمڭ منظومه‌سى ١٢٧
إزمير، مغنيسا و حواليسى آخرت همشيره‌لريمڭ بر مكتوبى ١٢٩
قونيه نور طلبه‌سى خانملرڭ مكتوبى ١٣٥
إستانبول نور طلبه‌سى خانملرڭ بر مكتوبى ١٤٣
نورجيلرڭ قصيدهسى ١٥٧
* * *